Zbërthejmë: Thaçi, Thaçi, Thaçi - Të gjitha pështjellimet e Kurtit në shkrimin e fundit - NACIONALE

Zbërthejmë: Thaçi, Thaçi, Thaçi - Të gjitha pështjellimet e Kurtit në shkrimin e fundit

1 muaj më parë

nga Dafina Demaku

Marrëveshja Bazë e dakorduar mes Kurtit dhe Vuçiqit si dhe Aneksi i Ohrit, përmbledhen nga ekspertë kushtetues e studiues të njohur politik kështu: “një Kushtetutë materiale për komunitetin serb në Kosovë” dhe ‘autonomia më e gjerë në Evropë’. Por, pavarësisht kësaj, Kurti vazhdon t’i evitojë këto emërtime (procese më mirë m’e thënë) kushtetuese dhe politike për Marrëveshjen e tij, duke gjetur fajtorë më të mëdhenj - në vitet 2013 dhe 2015.

Mes viteve 2013 dhe 2015, fytyrat si ajo e Hashim Thaçit dhe Isa Mustafa, zinin vend nëpër rrugët e Prishtinës dhe grafite ndërtesash me mbishkrimin ‘Isa, Hasha – Esat Pasha’.

Demonizimit të marrëveshjeve të arritura aso kohe, do t’i paraprinte premtimi se një parti politike që quhet Vetëvendosje, me të ardhë në pushtet, do t’i shqelmonte ato marrëveshje tradhtarësh, do ta ri-formatonte dialogun, do t’i rishikonte 39 marrëveshjet, bile nuk do të merrej me dialogun hiç, veç kur t’i vinte radha pas vendit të pesë a të gjashtë, nuk do të uleshin në tavolinë me Serbinë pa kërkuar falje kjo e fundit dhe një seri kushtesh e premtimesh tjera që mund të marrin shumë fjalë për t’i përmendur këtu.

Në një periudhë kohore jo shumë të gjatë, i gjithë paragrafi më lart, bjen poshtë, dhe Albin Kurti në pozitën e kryeministrit, thotë se duhet të zbatohen të gjitha 39 marrëveshjet e Brukselit.

Si zakonisht, fajtorët për gjithë ecurinë në dialog, janë në të majtë e në të djathtë, por vetëm në Qeverinë e udhëhequr nga ai jo.

*Kurti nënkupton se Serbia po e kërkon Marrëveshjen e vitit 2013, e nuk po e do këtë të vitit 2023.

*Kurti thotë se Marrëveshja e vitit 2013 dhe ajo e vitit 2015, u rrëzuan nga Kushtetuesja e Serbia i shkeli që të dyja.

Nyja e Kurtit ndodh si më poshtë:

* Nuk mund të flasim e diskutojmë vetëm për ‘Asociacionin’:

- pa e pranuar dhe respektuar Marrëveshjen Bazike (Bruksel, 27 shkurt 2023) me Aneksin e Zbatimit (Ohër, 18 mars 2023);

- pa përfshirë të gjitha 39 marrëveshjet e dakordimet në Bruksel (neni 10 i Marrëveshjes Bazike);

Derisa më lart në shkrim, Kurti i zhvlefëson marrëveshjet 2013 – 2015, më pas thotë se ato duhet të zbatohen të gjitha.

Thaçi, Thaçi, Thaçi

Tri herë në këtë shkrim, përmendet emri i ish-presidentit Hashim Thaçi, gjë që nuk përbën në vete ndonjë mëkat e as shkelje, por se referenca sikur marrëveshjet e kaluara janë shumë më të dëmshme sesa e Brukselit dhe Ohrit (Kurti – Vuçiq), tashmë është rrëzuar si ide gjërë e gjatë në opinionin publik edhe atë, nga ekspertët kushtetues.

Mjafton t’i referohemi njërit prej tyre, ai i ish-kryetarit të Gjykatës Kushtetuese, Enver Hasani, i cili në vazhdimësi deklaron se ‘Marrëveshja Bazike dhe Aneksi i Ohrit’ e ka ‘ndryshuar përgjithmonë karakterin unitar të shtetit të Kosovës’ duke çimentuar një Kushtetutë, e cila në termet kushtetuese, njihet si ‘Kushtetutë materiale’ për komunitetin serb në Kosovë.

Po ashtu, një tjetër studiues i njohur kosovar, z.Artan Mustafa, në vazhdimësi thotë dhe elaboron se si Marrëveshja Kurti – Vuçiq, i ka hapur rrugën ‘autonomisë më të gjerë në Evropë’.

Kurti përmend edhe marrëveshjen e Thaçit me NATO-në.

“E sot u bënë 11 vjet edhe nga zotimi i njëanshëm i ish kryeministrit Thaçi në Bruksel te sekretari i atëhershëm i përgjithshëm i NATO-s, Rasmussen, se FSK nuk do ta kalojë lumin Ibër pa lejen e KFOR-it”, shkruan ai.

Ndërkohë, i freskët është rasti nga Dakordimi i Bratisllavës, arritur nga zëvendëskryeministri Besnik Bislimi me Ndërmjetësin Lajçak, të cilin e zhveshë raporti i raportueses për Kosovën në Këshillin e Evropës, Dora Bakojanis, në pikën 61,si zotim që Njësitë Speciale të shkojnë në veri ‘veç në situata të jashtëzakonshme” me miratim të KFOR-it.

Do të doja të rikujtoj se në korrik 2023, në një takim me Përfaqësuesin Special të BE-së në Bratisllavë, autoritetet kosovare u pajtuan që prania e forcave speciale policore duhet të kufizohet vetëm në situata të jashtëzakonshme dhe prania e tyre duhet të pasojë prej vlerësimeve potenciale të përbashkëta të rrezikut të sigurisë me KFOR-in dhe EULEX-in. Këto terma, sidoqoftë, jo vazhdimisht zbatohen”, kashkruar Bakoyanis në raportin e saj.

Pas ‘rafalit’ ndaj fajtorëve dhe ‘trashigimisë politike’ (siç edhe e do rendi), kryeministri e përfundon shkrimin ‘me sukses’.

Lajme të ngjashme