Gjiganti i madh medial në Shqipëri fillon një përplasje me Edi Ramën
Që disa ditë në Shqipëri po ndodh një çudi, zor e konceptueshme. Kryeministri Edi Rama dhe gjiganti mediatik, "Top Channel", e kanë filluar përplasjen nga distanca, pasi televizioni transmetoi disa kronika kritike ndaj qeverisjes së liderit të PS-së. Ramës, që njihet për gjuhën jokorrekte ndaj medieve, nuk i pëlqyen titujt në edicionin e së dielës në "Top Channel". Dhe këtë e bëri publike.
Shefi i Qeverisë së Shqipërisë, kronikat me ton kritikues të televizionit i quajti “dezinformim e nxitje” kundër ekzekutivit. Doza e kritikës së "Top Channel"-it ishte e pashembullt, ndonëse që nga largimi i Sokol Ballës nga pozita e drejtorit, televizioni ka filluar t'i “nxjerrë shpatat” kundër Ramës.
E gjithë kjo i ka zënë në befasi analistët e gazetarët nga Shqipëria, që po vazhdojnë të hamendësojnë për këtë ndryshim kursi në qëndrimet redaktoriale të "Top Channel"-it.
Ndodhia e papritur
E diel, 30 tetor. Edicioni qendror i lajmeve në "Top Channel", njëra nga mediet kombëtare të Shqipërisë. Titujt e kronikat e disa prej lajmeve kryesore të televizionit janë shumë kritike kundër Qeverisë Rama, aq sa njëra shërben si paralajmërim për “shpopullimin” e Shqipërisë.
“Një nga tre shqiptarë iku nga Shqipëria”, “Të pastrehët e tërmetit”, “Kryeministri merr “peng” diplomat”, qenë disa prej titujve të kronikave jashtëzakonisht kritike ndaj qeverisjes së Edi Ramës.
Çfarë risie! "Top Channel", që me vite ishte i afërt me Ramën, tash kritik ndaj kryeministrit Rama që e udhëheq Shqipërinë nga viti 2013. Pas nëntë viteve mbështetje, "Top Channel"-i e kapërcen “rubikonin”, duke e kritikuar mënyrën se si qeveris i shumëkritikuari Rama.
Padurueshmërinë me kritikën e "Top Channel"-it e bëri publike Rama në Twitter, ndonëse nuk e përmendi me emër televizionin.
““700 mijë shqiptarë kanë ikur 12 vitet e fundit”•“7 punonjës në ditë ikin nga policia”•”Tre vite pas tërmetit s’kanë shtëpi”.Këta janë tituj lajmesh të rreme në ekrane private kombëtare që kanë një mision: Dizinformim e nxitje kundër qeverisë!Arsyeja? Duan favore të paligjshme!”, shkroi z.Rama.
“700 mijë shqiptarë kanë ikur 12 vitet e fundit”•“7 punonjës në ditë ikin nga policia”•”Tre vite pas tërmetit s’kanë shtëpi”.Këta janë tituj lajmesh të rreme në ekrane private kombëtare që kanë një mision: Dizinformim e nxitje kundër qeverisë!Arsyeja? Duan favore të paligjshme!
— Edi Rama (@ediramaal) October 30, 2022
Por i pari i Qeverisë së Shqipërisë nuk u ndal me kaq, duke e përmendur edhe “aleancën e Rublave”, një metaforë e përdorur për t'i kthyer në vëmendje dyshimet e akuzën se para ruse hynë në Partinë Demokratike vite më parë.
“Aleanca e Rublave është përditë e më e qartë, çdo ditë e më e tërbuar, ditë pas dite më e dëshpëruar! Një zëdhënës i saj, ngrënës i paepur i turpit me bukë apo i bukës me turp: S’kanë faj ata që shpifin, po ka faj kryeministri që s’bën transparencë për çdo shpifje! #DavaRublash”, vazhdoi Rama.
Kryeministri Rama e vazhdoi sulmin ndaj "Top Channel"-it edhe këtë të mërkurë, duke shpërndarë një dokument që, sipas tij, është "shembull se si funksionon shantazhi mediatik".
Ja për shembull se si funksionon shantazhi mediatik.Kërkohen 120mln lek nga AZHBR për t’u treguar shqiparëve kudo ndodhen sa mirë po ecën Shqipëria rurale. AZHBR s’e plotëson dot kërkesën e shpjeguar në shumë faqe se si e qysh tërë dynjaja do shohë shqip/anglisht suksesin e saj! pic.twitter.com/SEQo8Hpc6E
— Edi Rama (@ediramaal) November 2, 2022
E një përgjigje për këtë akuzë publike ka kthyer vetë televizioni "Top Channel", duke sqaruar se dokumenti i publikuar është pjesë e projekteve të "Top Media"-s.
"Top Media sqaron se ky dokument është pjesë e projekteve që Fondacioni “Dritan Hoxha”, që aplikon prej 15 vitesh në institucionet shqiptare dhe ndërkombëtare, që kanë për qëllim promovimin, advokimin e vlerave të vendit tonë dhe virtyteve të shoqërisë tonë.", thuhet në reagimin e "Top Channel"-it, që mund ta lexoni të plotë këtu.
Ndryshe, "Top Channel"-i që dhjetëra ditë ka nisur një ofensivë kritike ndaj Ramës, madje duke e ngritur alarmin se Shqipëria po rrëshqet “drejt autokracisë”.
Pse?
Andi Bushati, njëri nga analistët më të njohur e të respektuar në Shqipëri, ende nuk ka arritur ta rrokë krejt të vërtetën e ndodhisë së befasishme. I pyetur nga gazetarja e Nacionales, Arta Avdiu, rreth kësaj përplasjeje “titanësh”, z. Bushati ishte i qartë për paqartësinë e situatës.
"Të them të drejtën nuk jam shumë i qartë se çfarë po ndodh Arta", theksoi z.Buzhati.
Por, në një postim në Facebook, Bushati theksoi se në këtë përplasje nuk ka asgjë parimore.
“Të gjithë e dinë se në këtë përplasjen Rama -Top Channel nuk ka asgjë parimore. Por ama ajo na shërben për të kuptuar se kemi mbërritur në një pikë ku autokrati e quan shantazh po t’i thuash të vërtetën, sepse ato që u kujtua të denoncojë tani TCH (shpopullimi, çmimi i naftës apo kalvari i atyre që humbën shtëpite nga termeti) janë fakte të pranuara publikisht prej kohësh.”, shkroi Bushati në profilin e tij në Facebook.
Ndërsa gazetari Gjergj Erebara ka shkruar ditë më parë se reagimi i Ramës ndaj "Top Channel"-it është një përpjekje për t’u bërë si “i pashantazhueshëm”.
"Po në rast se Rama nuk ka dhënë kurrë asnjëherë ndonjë favor të paligjshëm për “ekrane private kombëtare”, çudi si i shkon në mend këtyre ekraneve ta shantazhojnë. Në fund fare ky ka dhjetë vjet në pushtet. Do ta kishin marrë vesh prej kohësh që është i pashantazhueshëm!!!," shkroi z.Erebara, që është gazetar në BIRN të Shqipërisë.
Kujtojmë që Shqipëria është ranguar jo mirë në Indeksin e Sundimit të Ligjit të matur nga “Wolrd Justice”, saktësisht në vendin e 87-të nga gjithsej 140 vende sa qenë pjesë e matjes. Madje ajo është rënditur shumë më keq se Kosova, e cila u listua në vendin e 57-të.
Shqipëria qëndron keq edhe në matjet e "Reporterëve pa Kufij" në lidhje me lirinë e medieve, duke u renditur e 103-ta në botë në vitin 2022, gjersa Kosova është në vendin e 61-të.
