KATAR 2022| FIFA nis hetimet ndaj Argjentinës pas incidenteve në fushë që ndodhën ndaj Holandës
FIFA ka nisur hetimet ndaj Argjentinës për shkak të sjelljes josportive që dëshmoi dje në fushë ndaj Holandës. Në mesin e lojtarëve të përfshirë në zënka dhe ofendime ishte edhe Leo Messi.
Gjyqtari Mateu Lohez, humbi tërësisht kontrollin e ndeshjes dje në çerekfinalen mes Argjentinës dhe Holandës. Ai në tërësi ndëshkoi me 15 kartonë të verdhë lojtarët e dy ekipeve.
Për shkak të disa sjelljeve josportive që ndodhën në fushë, instanca më e lartë e futbollit, FIFA, e ka parë të arsyeshme që të nisë një hetim ndaj Kombëtares së Argjentinës.
Kështu që, Komisioni Disiplinor i FIFA-s nisi këto hetime me dyshimin se janë shkelur nenet e saj të statutit. Po flasim për nenin 12 (sjellje jokorrekte e lojtarëve dhe drejtuesve) dhe nenin 16 (siguria dhe rendi në ndeshje) të Kodit Disiplinor të FIFA-s.
Hetime do të ketë edhe për Holandën, për të parë nëse edhe ajo ka shkelur nenin 12 të rregullores në fjalë, pasi edhe nga kampi argjentinas pati ankesa.
Në rastin e Argjentinës, vëmendja është te Messi, Dibu Martinez
dhe Paredes, pasi ishin protagonistë të disa sjelljeve që u kontestuan fort nga bankina e Kombëtares së Holandës.
Madje, Messi pas përfundimit të ndeshjes u pa tejet i nevrikosur, duke iu drejtuar “budalla” Weghorstit. Yllit argjentinas në ndihmë i erdhën Aguero dhe Lautaro Martinez, që i kërkuan sulmuesit anglez që ta mbyllte gojën.
