Alexey Navalny: Pas luftës, Rusia duhet të bëhet demokraci parlamentare
Disidenti i burgosur rus, Alexey Navalny thotë se e vetmja mënyrë që vendi i tij të shmangë një “cikël të pafund autoritarizmi perandorak” është të bëhet një demokraci parlamentare.
Duke shkruar për Washington Post, Navalny tha se ndërsa vendet perëndimore kanë pohuar me të drejtë rëndësinë e pavarësisë së Ukrainës dhe pengimin e Rusisë që të fitojë luftën në Ukrainë, ata duhet të fillojnë të mendojnë se si do të duket Rusia pasi të ndalojnë luftimet.
“Strategjia duhet të jetë që të sigurohet që Rusia dhe qeveria e saj natyrisht, pa detyrim, nuk do të duan të fillojnë luftëra dhe nuk i konsiderojnë ato tërheqëse,” shkroi Navalny në një letër të përcjellë për The Post nga ekipi i tij ligjor. Kujtojmë se, Navalny aktualisht është duke vuajtur një dënim me nëntë vjet burg në një koloni penale.
“Çështja e Rusisë së pasluftës duhet të bëhet çështja qendrore – dhe jo vetëm një element ndër të tjerat – i atyre që përpiqen për paqe. Asnjë qëllim afatgjatë nuk mund të arrihet pa një plan për të siguruar që burimi i problemeve të ndalojë së krijuari ato”, tha ai, duke shtuar se, "Rusia duhet të pushojë së qeni një nxitëse e agresionit dhe destabilitetit."
Navalny është kritiku më i shquar vendas i presidentit rus Vladimir Putin dhe pikëpamjet e tij kundërshtuese pothuajse i kanë kushtuar me jetë.
Në vitin 2020, ai u helmua me një agjent nervor - një sulm që disa zyrtarë perëndimorë dhe vetë Navalny fajësuan hapur Kremlinin, edhe pse Rusia ka mohuar çdo përfshirje.
Pas një qëndrimi pesë-mujor në Gjermani duke u shëruar nga helmimi me Novichok, Navalny vitin e kaluar u kthye në Moskë, ku u arrestua menjëherë për shkelje të lirimit me kusht të vendosur nga një çështje e vitit 2014. Në fillim të këtij viti, Navalny u dënua sërish me nëntë vjet burg me akuza për mashtrim që ai tha se ishin të motivuara politikisht.
Në letrën e tij, të botuar ditën kur Putin njoftoi se Rusia do të aneksonte rreth një të pestën e territorit të Ukrainës, Navalny tha se, lufta në Ukrainë – si konfliktet para saj – kanë ndihmuar ata që mbajnë pushtetin në Moskë.
“Elita ruse gjatë 23 viteve të fundit ka mësuar rregulla që kurrë nuk kanë dështuar: Lufta nuk është aq e shtrenjtë, ajo zgjidh të gjitha problemet e brendshme politike, rrit miratimin e publikut në qiell, nuk dëmton veçanërisht ekonominë dhe – më e rëndësishmja – fituesit nuk përballen me përgjegjësi”, shkroi Navalny.
Ai thotë se, zgjidhja, është miratimi i një forme qeverisjeje demokratike që decentralizon pushtetin, ngjashëm me atë që kanë përdorur shtetet baltike.
“Kërcënimi për paqen dhe stabilitetin në Evropë është autoritarizmi agresiv perandorak, i shkaktuar pafundësisht nga Rusia mbi vetveten”, tha Navalny.
“Rusia e pasluftës, ashtu si Rusia e pas Putinit, do të jetë e dënuar të bëhet sërish luftarake dhe Putiniste. Kjo është e pashmangshme për sa kohë të ruhet forma aktuale e zhvillimit të vendit. Vetëm një republikë parlamentare mund ta parandalojë këtë,” përfundoi ai.
