Zyrtare: Djokovic mungon në US Open, pasi iu ndalua hyrja në Amerikë shkaku i vaksinës
Novak Djokovic ka njoftuar se nuk do të luajë në grand slamin e fundit të këtij viti US Open, i cili nis të hënën, sepse s'i lejohet hyrja në Shtetet e Bashkuara për shkak se nuk është i vaksinuar kundër Covid-19.
“Fatkeqësisht, nuk do të jem në gjendje të udhëtoj drejt Nju Jorkut këtë herë për US Open”, njoftoi Djokovic në një shkrim në rrjetin social Twitter.
Sadly, I will not be able to travel to NY this time for US Open. Thank you #NoleFam for your messages of love and support. ❤️ Good luck to my fellow players! I’ll keep in good shape and positive spirit and wait for an opportunity to compete again. 💪🏼 See you soon tennis world! 👋🏼
— Novak Djokovic (@DjokerNole) August 25, 2022
Synimi përfundimtar i Novak Djokovicit, për ta përfunduar karrierën me më së shumti tituj grand slam në histori, mori tjetër goditje të enjten pasi ai përfundimisht mësoi se SHB-ja nuk do të bëjë përjashtim nga ligjet e saj për ta lejuar të luajë në Nju Jork.
Tenisti serb i ka fituar 21 tituj grand slam, të fundit në Wimbledon muajin e kaluar, dhe ngel një titull mbrapa Rafael Nadalit i cili mban rekordin për më së shumti.
Por vendimi i Djokovicit për të mos u vaksinuar kundër pandemisë Covid-19 nënkupton se ai ka humbur disa mundësi këtë vit për të fituar më shumë tituj. Atij nuk iu lejua të luajë në Australian Open në fillim të këtij viti dhe tani as në US Open, i cili nis në fund të këtij muaji.
Djokovici, emri i të cilit u shfaq në listën e lojtarëve pjesëmarrës në US Open për këtë vit deri sot, nuk është vaksinuar kundër Covid-19 dhe që prej tetorit 2021, Shtetet e Bashkuara ua kanë ndaluar hyrjen në vend vizitorëve të pavaksinuar.
Qendra e SHBA-së për Parandalimin dhe Kontrollimin e Sëmundjeve (CDC), e cila agjenci kombëtare për mbrojtjen e shëndetit, kërkon që qytetarët e huaj të kenë patjetër dëshmi se janë plotësisht të vaksinuar kundër Covid-19 para se të udhëtojnë me aeroplan nga një vend i huaj.
Ky ligj ia ka ndaluar Djokovicit pjesëmarrjen në turnet ATP Masters 1000 në Indaian Wells dhe Miami në mars dhe në prill, si dhe në Cincinnati Open javën e kaluar.
Tenistit serb do t’i duhet të presë deri në fillim të vitit të ardhshëm për të tentuar ta barazojë rekordin e Nadalit për më së shumti titujt grand slam, në Australian Open 2023 në Melbourne.
