Perfeksioni spanjoll kundër shpirtit argjentinas: Sonte kurorëzohet kampioni i botës
Bota e futbollit i kthen sytë sonte në New York New Jersey Stadium. Në orën 21:00, me orën e Kosovës, Spanja dhe Argjentina do të zhvillojnë ndeshjen e 104-t dhe përmbyllëse të Botërorit 2026. Kjo finale madhështore gërsheton kampionët në fuqi, skuadrën më solide të viteve të fundit dhe dy epoka të ndryshme të lojës: Lionel Messin dhe Lamine Yamalin.
Për 39-vjeçarin Messi, kjo mund të jetë nata e fundit me fanellën e Argjentinës dhe mundësia e artë për mbyllje të pabesueshme. Kapiteni argjentinas numëron tetë gola dhe katër asistime në këtë Botëror. Me 21 gola në karrierën e tij në këtë kompeticion, ai zbret në finale vetëm një gol pas rekordmbajtësit të ri, Kylian Mbappé. Një triumf do ta shndërronte Argjentinën në kombëtaren e parë që mbron me sukses titullin që nga Brazili i viteve 1958 dhe 1962.
Përballë tij qëndron Yamal, 19-vjeçari që dikur ishte imortalizuar si foshnjë në krahët e Messit, e që sonte mund t’ia mbyllë legjendës portën e fundit drejt lavdisë supreme. Sulmuesi i Barcelonës vjen pas një gjysmëfinaleje mbresëlënëse kundër Francës, ku fitoi penalltinë që zhbllokoi sfidën në triumfin 2:0. Ai ka pasur disa shqetësime fizike dhe kontuzione pas atij takimi, çka e detyroi të stërvitej veçmas si masë parandaluese, por Spanja pret me ngulm që ai të jetë i gatshëm.
Megjithatë, kjo finale nuk është thjesht duel mes Messit dhe Yamalit. Ajo është përballja mes diktatit taktik spanjoll dhe frymës së mbijetesës argjentinase.
Spanja vjen me një ecuri mbresëlënëse prej 37 ndeshjesh radhazi pa humbje, ka pësuar vetëm një gol në shtatë përballjet e këtij Botërori dhe nuk është gjendur për asnjë sekondë në disavantazh. Loja e saj bazohet te qetësia në qarkullimin e topit, rregulli pozicionues kolektiv dhe aftësia për ta shndërruar presionin e kundërshtarit në hapësirë për sulm.
Argjentina, nga ana tjetër, ka kaluar përmes vuajtjesh më të mëdha, por pikërisht në ato vështirësi ka gjetur forcën e saj karakteriale. Kampionët në fuqi përmbysën disavantazhin prej 0:2 për të mposhtur Egjiptin 3:2, dhe eliminuan Anglinë 2:1 në gjysmëfinale, me Messin protagonist si asistues në të dy golat.
Skuadra e Lionel Scalonit nuk e zotëron pastërtinë strukturore të Spanjës, por ka përvojë të jashtëzakonshme, lojë vertikale dhe një besim të palëkundur se asnjë betejë nuk përfundon para fishkëllimës së fundit.
Përgatitjet e fundit ishin të vështira raportuan mediat amerikane si pasojë e stuhive të ashpra që përfshinë Nju Jorkun dhe Nju Xhersin. Spanja u detyrua të anulonte stërvitjen në fushë, ndërsa Argjentina e nisi seancën e saj me 45 minuta vonesë.
