Santos: Lënia në stol e Ronaldos është zgjedhje strategjike, ai është një profesionist i jashtëzakonshëm

Cristiano Ronaldo nuk është në mesin e titullarëve për ndeshjen çerekfinale të sotme kundër Zvicrës. Për përzgjedhësin Fernando Santos bëhet fjalë vetëm për një zgjedhje strategjike.

Për ndjekësit e futbollit fakti që Ronaldo nuk ishte në mesin e lojtarëve titullarë kur u publikua formacioni zyrtar i Portugalisë, zgjoi kuriozitet enorm.

Katar 2022 / CR7 nuk nis titullar te Portugalia për herë të parë që nga viti 2008

Megjithatë, përzgjedhësi portugez sqaron se e gjitha është vetëm një zgjedhje strategjike, që nuk ka të bëjë asgjë me ndonjë masë kundër tij.

“Është një zgjedhje strategjike. Jemi duke u përgatitur qe disa ditë. Aspak nuk ka të bëjë me deklaratat e tij në fund të ndeshjes ndaj Koresë Jugore. Ajo çështje ka përfunduar”, tha ai.

Santos po ashtu beson fuqimisht në profesionalizmin e Ronaldos dhe është i bindur se ylli portugez do të jetë akter i rëndësishëm në fushë nëse do të inkuadrohet gjatë ndeshjes.

“Ronaldo është një profesionist i jashtëzakonshëm dhe nëse do të inkuadrohet në ndeshje, sigurisht se do ta ndihmojë Portugalinë”, u shpreh ai.

Pas 14 vitesh lihet në stol

Ylli Cristiano Ronaldo nuk do të nisë nga minuta e parë për herë të parë që nga viti 2008 në turne të mëdhenj për Portugalinë.

Përzgjedhësi Fernando Santos publikoi 11-shen bazë për ndeshjen ndaj Zvicrës, duke zgjedhur Gonzalo Ramos nga minuta e parë para ish yllit të Manchester United.

Tani, "OptaJoao" ka publikuar një statistikë të jashtëzakonshme, ku portugezi i jep fund 31 ndeshjeve si titullar i padiskutueshëm.

"Cristiano Ronaldo nuk do të nis një ndeshje për Portugalinë në turne të mëdhenj për herë të parë që nga viti 2008 (gjithashtu kundër Zvicrës), duke i dhënë fund rekordit prej 31 ndeshjeve", shkruhet nga "Opta".