Një javë past takimit të madh Kurti-Vuçiq, cilat ishin ngjarjet kryesore?
Sot është bërë një javë prej takimit të 27 shkurtit në Bruksel mes kryeministrit Kurti dhe presidentit serb Vuçiq. Cilat ishin ngjarjet kryesore prej atëherë?
Shefi i diplomacisë evropiane, Josep Borrell, në konferencën për medie menjëherë pas takimit u shpreh se palët ishin pajtuar me Propozimin Evropian dhe për të cilin nuk do të diskutohej më. Do të diskutohej vetëm për planin e zbatimit.
Disa orë më pas
Pak orë më pas, Bashkimi Evropian do ta publikonte Propozimin Evropian me përmbajtjen e të cilit ishin pajtuar si Kurti ashtu edhe Vuçiqi.
E kjo përmbajtje ishte e ngjashme, për të mos thënë identike, me tekstet që ishin publikuar muaj më parë nga media të Kosovës e të Serbisë. Doli se përnjëmend nuk kishte njohje nga Serbia, doli se nuk kishte garanci për njohje nga shtetet mos-njohëse të BE-së, dhe se kishte Asociacion.
Disa minuta më pas
Kurti po ashtu e pranoi se në propozimin me të cilin ishte pajtuar ekzistonte Asociacioni, por vend kishte se ku ndodhej: fjalia e fundit e nenit të fundit. A do të thoshte kjo se Asociacioni nuk vlen? Natyrisht, nuk e tha një gjë të tillë.
Protestuesi i vetëm
Protestuesi i vetëm në takimin e 27 shkurtit duket se ishte një aktivist i klimës. Ai do të bërtiste para dy gazetarëve kosovarë se “po e shkatërronin planetin”. Nuk dihet se çka po bënin gazetarët që po e shkatërronin planetin, por dihet se ky nuk mund të merret si një ogur i mirë.
Disa orë më pas, Vuçiqi
Presidenti i Serbisë do të fliste para qytetarëve të tij për takimin që kishte pasur. Dhe kjo e ndezi një përplasje të re me kryeministrin Kurti.
Presidenti serb do të deklaronte se nuk do të pajtohej asnjëherë me anëtarësimin e Kosovës në OKB.
“Serbia ka gatishmëri që të punojë për zbatimin e shumë gjërave nga propozimi, por ne e bëmë një kundërshtim të madh e të qartë. Këtë gjë ia thashë Macronit dhe Scholzit në Mynih, dhe krejt liderëve të mëdhenj. Është fjala se nuk dua dhe nuk mund të bisedohet për njohje reciproke dhe për pranim e hyrje të Kosovës në OKB.” - ishte shprehur Vuçiq.
Sipas Kurtit, me këtë deklaratë, Vuçiq do të shkelte Nenin IV të Propozimit Evropian.
Ia kthen Kurti
Me anë të një cicërime në Twitter, kryeministri i vendit ishte shprehur se deklarata e Vuçiq “përbënte shkelje të Nenit IV të Propozimit Evropian”. Ai po ashtu e denoncoi Serbinë që nuk po operonte në mirëbesim.
Njohja dhe Bislimi
Për Propozimin Evropian do të fliste edhe zv. kryeministri Besnik Bislimi. Në një paraqitje televizive për RTK-në ai do ta pranonte që mungesa e njohjes ishte “koncesion i madh” i Kosovës, por në anën tjetër do të tregonte se nuk e dinte as renditjen e neneve.
Në dy raste gjatë intervistës, ai i referohet nenit 6 si “paragrafi 5” dhe “neni 5”.
Por, në pjesën më bizare të intervistës, ai shprehet efektivisht që BE-ja e shihte ndryshe Nenin 7 ndërsa Kosova e shihte ndryshe.
“Ne e shohim (Asociacionin) në nenin 10 tek marrëveshjet e kaluara, zbatimi i marrëveshjeve të kaluara... me gjasë sipas një interpretimit të Bashkimit Evropian, ata Asociacionin e shohin edhe tek pika 7, pjesa e parë, te vetëmenaxhimi. Që tregon se për Bashkimin Evropian nuk po flitet për të drejta kolektive të komunitetit, komunikimit por për një lloj koordinimi për koordinimin e aktiviteteve të komunave me shumicë serbe.”
Njohja dhe Kurti
Edhe më i përçudshëm në arsyetimin e mungesës së njohjes do të tregohej shefi i tij, Albin Kurti.
Kryeministri do të deklaronte se ishim në gjendje të “mos-njohjes reciproke”, derisa krenohej se si ai nuk e njihte Serbinë. Megjithatë, Kurti nuk kishte treguar se çka donte të thoshte me këto deklarata dhe kujt i hynin në punë ato!
Amerika e shqetësuar me PDK-në dhe LDK-në
Dhe, zhvillimi më i madh duket se ka ardhur pikërisht sot. ShBA-ja me anë të zëdhënëses së ambasadës në Prishtinë ka shprehur shqetësime në lidhje me deklaratat e dy partive më të mëdha opozitare të shprehura përgjatë kësaj jave.
“Jemi të shqetësuar me deklaratat e bëra nga drejtues dhe zyrtarë të partive opozitare që shprehin kundërshtimin e tyre ndaj propozimit të BE-së,” – u shpreh një zëdhënëse e ambasadës amerikane në Prishtinë.
“Këto pikëpamje nuk përputhen me mbështetjen e ShBA-ve për propozimin,” – thuhet më tej në këtë reagim.
