Avni Dehari nuk doli nga Kuvendi shkaku i fjalëve të Berishës, tash Kurti thotë "Nuk kisha rast të flas me axhën Avni"
Deputetja e Vetëvendosjes u shpreh se Avni Dehari, babai i aktivistit të ndjerë Astritit, ishte larguar nga salla për shkak të fjalëve të deputetit të PDK-së, Hisen Berishës. Por, del se ky nuk ishte në fakt shkaku. Çka thotë tash Tinka Kurti?
Deputete Kurti u shpreh si vijon: “Avni Dehari e lëshoi sallën. Njeriu që ka duruar gjithçka, pafytyrësinë e deputetit Berisha nuk mundi.”
Por, Avni Dehari e mohoi në një prononcim për Nacionalen se ishte largar për këtë shkak.
“Unë e kisha një termin për dorëzimin e librave për bibliotekën e Shtëpisë së Kongresit të Manastirit që po mblidheshin punëtorët e Ramiz Sadrikut në Pejton. Kjo ka qenë arsyeja që kam dalë prej aty,” – u shpreh për Nacionalen z. Dehari.
Deputetja Kurti u pyet nga Nacionale për arsyen pse kishte shkruar atë deklaratë në Facebook.
“Nuk kisha rast të flas me axhën Avni! Për mua vetë situata ishte e padurueshme!” - u përgjigj ajo.
Çka ndodhi?
Deputeti i PDK-së, Hisen Berisha, doli në foltore të Kuvendit të Kosovës për të folur mbi rastin Dehari. Ai ngriti pretendime të forta kundër Lëvizjes Vetëvendosje për manipulim të këtyre rasteve, e po ashtu edhe spekuloi për vetëvrasjen e Arbnor Deharit, të vëllait të Astrit Deharit.
