Haradinaj për policët e rinj serbë: Presionet dhe kërcënimet ndaj tyre janë përpjekje për të sabotuar depërshkallëzimin
Kryetari i Aleancës për Ardhmërinë e Kosovës (AAK) Ramush Haradinaj, ka reaguar pasi zyrtarëve policorë serbë të Policisë së Kosovës po u bëhet presion dhe po kërcënohen për shkak që kanë pranuar të veshin uniformën e Policisë së Kosovës.
Haradinaj ka thënë se këto presione e kërcënime janë të papranueshme dhe përpjekje për të sabotuar shtensionimin dhe qetësimin e situatës.
“Pjesëtarët e komuniteteve pakicë, përfshirë këtu edhe serbët, duhet të lejohen të lirë në realizimin e të drejtave të tyre qytetare.” – ka shkruar ndër të tjera Haradinaj në Facebook.
Shkrimi i plotë:
Presionet dhe kërcënimet ndaj pjesëtarëve të komunitetit serb dhe komuniteteve tjera në veri, që janë bërë pjesë e Policisë së Kosovës, janë të papranueshme dhe përpjekje për të sabotuar depërshkallëzimin dhe qetësimin e situatës.
Pjesëtarët e komuniteteve pakicë, përfshirë këtu edhe serbët, duhet të lejohen të lirë në realizimin e të drejtave të tyre qytetare.
Qytetarët serbë dhe çdo pjesëtar i komuniteteve pakicë duhet ta konsiderojnë Kosovën si atdheun e tyre dhe të integrohen plotësisht në institucionet e Kosovës!
