Whyte i reagon ashpër Tyson Furyt: Mbylle gojën e madhe dhe lufto kundër Joshuas
Dillian Whyte thotë se Tyson Fury duhet ta “mbyllë gojën e madhe” nëpër rrjetet asociale dhe të lejojë vazhdimin e bisedimeve për luftën britanike me Anthony Joshuan.
Fury ka deklaruar në rrjetet sociale se nuk do të ndodhë lufta mes tij dhe Joshuas, pasi ky i fundit nuk e kishte nënshkruar kontratën brenda afatit të vendosur nga kampioni i WBC-së të hënën deri në orën 17:00.
Por Whyte beson se Fury i ka ndryshuar planet me reagimet publike dhe e ka këshilluar të heshtë derisa bisedimet të vazhdojnë mes palëve.
“Ai (Fury) duhet të qetësohet patjetër. Mënyra se si ai bën bisedime për biznes gjithmonë nëpër rrjetet sociale duke bërtitur dhe duke i quajtur njerëzit të pastrehë. Unë nuk jam adhurues as i Anthony Joshuas, nuk më pëlqen asnjëri prej tyre”, tha Whyte për Sky Sports.
“Ai duhet thjesht ta mbyllë gojën e madhe dhe të mos flasë më. Nganjëherë ia vlen të jesh i durueshëm për një luftë të madhe”.
“Nëse ai dëshiron që lufta të ndodhë, duhet të jetë i durueshëm, sepse bëhet fjalë për shumë para dhe shumë gjëra, prandaj duhet kohë”, shtoi ai.
Fury i ofroi mundësi Joshuas të luftojë për titullin e kampionit të botë në kategorinë e rëndë në WBC, dhe vonesat e tij për ta nënshkruar marrëveshjen duket se do të bëjnë që të dështojë sërish lufta e shumëpritur britanike mes tyre.
Joshua vjen nga dy disfata radhazi kundër Oleksandr Usyk dhe humbja e titujve të botës në kategorinë e rëndë në WBO, WBA dhe IBF.
