Emisarët e Trumpit mbërrijnë në Moskë përpara bisedimeve për Ukrainën
Dy emisarët kryesorë të presidentit amerikan Donald Trump kanë mbërritur në Moskë përpara bisedimeve të fundjavës, të cilat synojnë të përshpejtojnë përpjekjet për t’i dhënë fund luftës në Ukrainë.
Steve Ëitkoff dhe Jared Kushner pritej të mbërrinin në kryeqytetin rus të shtunën, ku do të zhvillojnë bisedime përpara se të udhëtojnë drejt Kievit të dielën për takime me palën ukrainase.
Trump u tha gazetarëve të premten se të dy "po sjellin me vete një propozim për t’i dhënë fund luftës". Deri tani, përpjekjet e SHBA-së dhe aleatëve të saj për të ndërmjetësuar një marrëveshje paqeje nuk kanë sjellë një përparim të rëndësishëm.
Media amerikane Axios raportoi se të dërguarit amerikanë do të takohen veçmas si me presidentin rus Vladimir Putin, ashtu edhe me presidentin ukrainas Volodymyr Zelensky.
Ëitkoff dhe Kushner u fotografuan duke u përshëndetur nga diplomati rus Kirill Dmitriev pas mbërritjes në aeroportin Vnukovo të Moskës.
Të dhënat e gjurmimit të fluturimit treguan se një avion i qeverisë amerikane kishte udhëtuar nga Helsinki i Finlandës, ku kishte mbërritur nga SHBA-ja më herët gjatë ditës.
Dy të dërguarit kanë udhëtuar në Moskë disa herë që kur Trump u rikthye në detyrë, por e diela do të jetë vizita e tyre e parë në Kiev. Delegacione nga Ukraina kanë marrë pjesë në bisedime në SHBA gjatë 18 muajve të fundit.
Media shtetërore ruse, duke cituar Kremlinin, raportoi se Putin kishte urdhëruar ndalimin e sulmeve ndaj Kievit për tre ditë, duke filluar nga mesnata e së shtunës, për shkak të vizitës së zyrtarëve amerikanë.
Më herët të shtunën, Zelensky tha se Rusia kishte kryer sulme "demonstrative" ndaj aeroporteve në Kiev dhe Boryspil gjatë natës, përpara takimit të planifikuar me përfaqësuesit amerikanë.
Presidenti i Ukrainës shtoi: "Është e qartë se këto sulme ruse ndaj aeroporteve janë një reagim ndaj diskutimeve dhe përgatitjeve për mundësinë që pala amerikane të përdorë një avion për të udhëtuar drejt Ukrainës dhe për të zbritur në aeroportin e Kievit ose në Boryspil."
Hapësira ajrore e Ukrainës është e mbyllur që nga fillimi i pushtimit të plotë rus në shkurt të vitit 2022.
Zelensky tha të premten se do të garantonte sigurinë e hapësirës ajrore ruse gjatë vizitës së të dërguarve dhe i bëri thirrje Rusisë të bëjë të njëjtën gjë për Ukrainën.
