Odegaard shpërblehet për paraqitjet e mira, nënshkruan kontratë afatgjate me Arsenalin dhe bëhet lojtari më i paguar në klub

Mesfushori dhe kapiteni i Arsenalit, Martin Odegaard, ka nënshkruar kontratën e re, që do ta mbajë atë në Fly Emirates deri në verën e vitit 2028, duke e bërë kështu futbollistin më të paguar te topçinjtë.

Kapiteni i Arsenalit më në fund ka vendosur firmën në një kontratë të re pesëvjeçare, e cila do ta shohë atë të vazhdojë në klub deri në vitin 2028. Marrëveshja e tij e mëparshme, e cila ishte me vlerë 120,000 £ në javë, do të skadonte në vitin 2025. Pas nënshkrimit të kontratës së re, reprezentuesi danez tani do të bëhet lojtari më i paguar i klubit.

24-vjeçari është paraqitur në 92 ndeshje në Premierligë për Topçinjtë deri më tani, që kur mbërriti në klub nga Real Madridi në vitin 2021 për 35 milionë euro plus shtesa. Ai ka shënuar 25 gola në elitën angleze dhe ka bërë 14 asistime.

Duke folur për Arsenal.com pas nënshkrimit të marrëveshjes së re, Odegaard tha: "Nënshkrimi i një kontrate të re ishte një vendim vërtet i lehtë për mua për shumë arsye. Kryesisht ajo që po bëjmë tani si klub është e veçantë, dhe unë dua të jem pjesë e kësaj. Jam shumë i emocionuar për atë që do të vijë këtu. Kam gjetur një vend ku mund të vendosem vërtet dhe të thërras shtëpinë time. Historia ime është paksa e ndryshme ndoshta, pasi kam lëvizur nëpër klube të ndryshme që kur isha 16 vjeç. Në Arsenal, që nga dita e parë, jam ndjerë shkëlqyeshëm dhe kjo është padyshim shtëpia ime tani. Thjesht dua të falënderoj të gjithë ata që punojnë në klub dhe sigurisht, mbështetësit tanë fantastikë. Unë do të vazhdoj të jap gjithçka për t'i sjellë sukses këtij klubi në vitet në vijim."

Futboll / Odegaard: Gara për vendin titullar është e madhe dhe shumë e mirë për ne

Arsenali në krye me Odegaard, ndeshjen e radhës e zhvillojnë të dielën, kur do të takohen me rivalët e qytetit, Tottenham Hotspur në derbin e Londrës Veriore, me dy skuadrat në formë të mirë në këtë fillim sezon.