Mërgim Vojvoda thyen heshtjen: Flet për pozitën e re, trajnerin si dhe rinovimin me Torinon

Mbrojtësi Mërgim Vojvoda është gati të luajë në një pozitë të re me trajnerin Vanoli që zëvendësoi Juricin, në krye të skuadrës së Torinos.

Ylli kosovar pritet të ketë rol të rëndësishëm te klubi italian në sezonin 2024/25, ndërsa ka folur gjatë në konferencë për media pas mbylljes së fazës parapërgatitore.

“Sot përfundon një punë e rëndësishme me një trajner të ri, një lojtar të ri që është blerë dhe me një sistem të ri loje. Ka shumë gjëra të reja, por ne kemi punuar”.

“Roli i ri? Është një rol i ri që, sigurisht, duhet ta mësoj. Kam luajtur më parë edhe me trajnerin Juric, por tani është një çështje tjetër dhe është ndryshe nga mënyra se si kam luajtur më parë, kështu që ka gjëra për të mësuar. Këto janë gjëra që mund t’i bëj. Më pëlqen dhe jam i kënaqur me të, trajneri më jep besim dhe duhet të mësoj disa gjëra dhe mendoj se mund të bëj mirë.

“Pak pushim dhe pastaj sfidat franceze, a jeni gati? Po, unë preferoj të luaj ndeshje më të vështira që na lejojnë të hyjmë në sfida të vështira të ngjashme me ato të Serisë A. Do të shkojmë fillimisht në Lyon dhe më pas në Metz dhe shpresoj të vazhdojmë të bëjmë mirë dhe të jemi gati për ndeshjen e parë në Kupën e Italisë.

“Çfarë ju kërkon Vanoli ndryshe në krahasim me Juric në rolin e mbrojtësit të djathtë? Tani ne luajmë më shumë pa top, ndërsa më parë ishte më shumë një kundër një. Për tre vjet luaja si i pesti ose i treti dhe ishte njësoj nëse ndjek kundërshtarin. Tani koncepti është ndryshe: ka një mbrojtje në linjë. Ka lëvizje të tjera për të bërë dhe ne duhet të punojmë për këtë, gjë që është e ndryshme mes dy trajnerëve.

“Tashmë jeni veteran, si po e përjetoni këtë ndryshim të drejtimit teknik? Për mendimin tim, kursi i ri mund të sjellë vetëm gjëra pozitive dhe të freskëta dhe tani për tani gjithçka është në rregull. Ka një ambient të këndshëm dhe ne lojtarët shkojmë mirë dhe stafi është i mirë, kështu që gjithçka është në rregull.

“Kontrata juaj po skadon, a po negocion menaxheri juaj rinovimin? Ka mbetur edhe një vit në kontratën time me Torinon dhe kemi biseduar për rinovimin. Jam i lumtur këtu, kam ende një kontratë dhe nuk ka nxitim. E rëndësishme është që unë t’i tregoj trajnerit cilësitë e mia dhe duhet të përqendrohem më shumë në fushë se sa në gjëra të tjera, kështu që nuk kam nxitim.

“A ju ka thënë Vanoli se ky do të jetë roli juaj përfundimtar apo është i përkohshëm? Për momentin, jam duke luajtur si krah i djathtë, por trajneri Vanoli e di që unë mund të luaj edhe si i pesti dhe nëse nevojitet mund ta bëj”, deklaroi ai.