Klopp: Liverpooli është shumë më afër Manchester Cityt këtë sezon
Trajneri i Liverpoolit, Jurgen Klopp, ka thënë se skuadra e tij është shumë afër Manchester Cityt këtë sezon, por është i vetëdijshëm për forcën që kanë kampionët në fuqi të Premierligës, para takimit të tyre të së shtunës.
Herën e fundit që të dy skuadrat u takuan në ligë, City fitoi me rezultat të thellë 4:1 në Etihad Stadium dhe vazhdoi të përfundojë sezonin 22 pikë përpara Liverpoolit.
Por pas rifreskimit të skuadrës në verë, veçanërisht në mesfushë me ardhjen e Dominik Szoboszlai, Alexis Mac Allister dhe Ryan Gravenberch, skuadra e Klopp tani gjendet në vendin e dytë, një pikë pas Cityt.
"E shtuna është një ditë e vështirë, është skuadra më e fortë në botë për vitet e fundit. Rekordi ynë [në Etihad] nuk është i mirë do të më thoni! Ata janë jashtëzakonisht të fortë, asgjë që mund të them nuk i bën më të dobët, përndryshe do t'i bëja. Viti i kaluar është vetëm një kujtim”, tha Klopp në konferencën e tij për shtyp të premten.
"Nëse i bëjmë të jenë të parehatshëm, kemi një shans. Nëse ata janë rehat në lojën e tyre, asnjë ekip nuk ka një shans. Ndjehet sikur jemi pak më afër [këtë sezon], por ne duhet të fitojmë beteja vendimtare në fushë. Unë jam larg ulur këtu dhe mendoj 'ne kemi përballë Cityn'. Nuk është 'City kujdes'. Ata janë jashtëzakonisht të fortë."
Klubi i Merseyside është e vetmja skuadër përveç Cityt që ka fituar ligën që nga viti 2018 dhe ka qenë dy herë në krye deri në ditën e fundit të sezonit ndaj skuadrës së Pep Guardiolës.
Pavarësisht ashpërsisë së takimeve të tyre të kaluara, Klopp tha se nuk ishte i sigurt kur u pyet nëse ishte rivaliteti më i madh në Premierligë.
"A është rivaliteti më i madhi? Nuk e di, por është ndeshja më e vështirë që mund të luash për vite me radhë. Tifozët do të vendosin rivalin, por në aspektin e futbollit na duhej kohë për t'u bërë rival në fushë," tha ai.
