Eliminohet kampioni në fuqi, Real Madridi fiton në penallti ndaj Man Cityt dhe kualifikohet në gjysmëfinale
Ndeshja që u konsiderua si finale para finales, ashtu edhe ndodhi. Një ndeshje e shkëlqyer mes dy skuadrave më të mira momentalisht në Evropë, ku fituesi u përcaktua vetëm nga penalltitë, me Real Madridin që siguron gjysmëfinalen në Ligë të Kampionëve, ndërsa kampioni në fuqi Manchester City e mbyll këtu rrugëtimin e saj.
Përballja e parë përfundoi me barazim 3:3 në Santiago Bernabeu, ndërsa sot në ndeshjen e kthimit 90 minutat e parë u mbyllën me barazim 1:1, me Real Madridin që kishte epërsinë fillimisht.
Rodrygo shënoi golin e epërsisë për Mbretërit në minutën e 12-të, duke i dhënë skuadrës së tij një avantazh të madh.
Por skuadra e drejtuar nga Pep Guardiola që nga ajo minutë mori kontrollin e ndeshjes në dorë dhe arriti që disa herë të rrezikonte, me Lunin, portierin e Real Madridit që dëshmoi vetën me pritjet e tij.
Por portieri ukrainas nuk arriti ta mbajë portën e paprekur, pasi Kevin De Bruyne arriti ta barazonte rezultatin në minutën e 76-të, me rezultatin e përgjithshëm që shkoi në 4:4.
Si rrjedhojë, pasi fituesi nuk u përcaktua në kohë të rregullt, ndeshja shkoi në vazhdime me dy pjesë nga 15 minuta.
As pas 30 minutave lojë nuk pati fitues, me penalltitë që mbeten e vetmja mënyrë për të dhënë gjysmëfinalistin e fundit, mes këtyre dy superfuqive evropiane.
Në penallti, Mbretërit u treguan më gjakëftohtë, duke humbur vetëm një me Luka Modric, ndërsa te Manchester City gabuan Bernardo Silva e Mateo Kovacic, kështu me Real Madridin që del fitues nga kjo çerekfinale, që mund të konsiderohet si një hakmarrje për atë humbjen e thellë që Qytetarët ia shkaktuan Real Madridit në sezonin e kaluar.
Real Madrid is in semi finals!pic.twitter.com/FnT7tW7YGc
— FootColic ⚽️ (@FootColic) April 17, 2024
Me Bayern Munich që triumfoi ndaj Arsenalit me rezultat të përgjithshëm 3:2, gjysmëfinalja tjetër e Ligës së Kampionëve do të jetë mes Bavarezëve dhe Real Madridit të Carlo Ancelottit.
