Dybala dhe Mourinho i përgjigjen Thiago Silvas, pasi braziliani kërkoi transferimin e argjentinasit te Chelsea
Ylli i Romës, Paulo Dybala dhe trajneri Jose Mourinho, kanë thënë fjalën e tyre, pasi Thiago Silva i Chelseat tha dje se ka biseduar me argjentinasin për një transferim të mundshëm te Chelsea.
Trajneri i ri i Chelseat, Mauricio Pochettino dihet se është një admirues i Dybalas dhe dëshironte të nënshkruante me bashkatdhetarin e tij gjatë kohës së tij në Tottenham Hotspur. Mbrojtësi i të kaltërve, Thiago Silva, së fundmi shprehu admirimin e tij për sulmuesin argjentinas dhe pranoi se e kishte pyetur Dybalan nëse do të nënshkruante për Chelsean.
Ylli 29-vjeçar tani i është përgjigjur spekulimeve dhe pohoi se është i lumtur te Roma dhe mezi pret t'i bashkohet stërvitjeve parasezonale të klubit këtë muaj.
Duke folur për LaRoma24 për një lëvizje të mundshme te Chelsea, Dybala tha, "Jam i motivuar për para-sezonin, të cilin do ta fillojmë [të hënën]. E ardhmja ime? Jam i lumtur te Roma, jam duke qëndruar këtu."
Roma besohet se dëshiron të zgjasë kontratën e Dybalas, e cila zgjat deri në vitin 2025 dhe Mourinho për sulmuesin e tij ka thënë: "Unë nuk di asgjë për kontratën e tij. Por padyshim, unë flas me Paulon ashtu siç flas me të gjithë lojtarët e mi”.
Argjentinasi u shfaq në 39 ndeshje për Romën në të gjitha garat në sezonin e tij debutues me klubin ku shënoi 15 gola dhe dha gjashtë asistime.
Dybala raportohet se ka një klauzolë lirimi prej 10 milion £ (12.8 milion dollarë) në kontratën e tij, e cila mund të paguhet nga klube jashtë Serisë A. Edhe pse Christopher Nkunku dhe Nicolas Jackson i janë bashkuar klubit këtë sezon, Pochettino mendohet se ende dëshiron një sulmues më shumë për të përforcuar sulmin.
