Shteti s’ia siguron ilaçet: Rrëfimi i pacientit që ka hall se mos vdes nga mungesa e terapisë
Ka më shumë se një javë që 114 pacientë me sëmundje reumatike nuk i kanë marrë ilaçet bazike për këtë sëmundje. Kjo pasi që shteti ka dështuar që t’ua sigurojë ilaçin esencial për trajtimin e tyre. Bëhet fjalë për barin “Etanercept”. Nga MSH po arsyetohen se kjo punë ka ndodhur për shkak të procedurave duke thënë se për momentin kanë arritur t’i sigurojnë vetëm 100 ampula të tilla, të cilat mbulojnë terapitë e vetëm 50 pacientëve të kësaj kategorie.
Para dyerve të Ministrisë së Shëndetësisë qëndron gjatë. Aty Skënder Ajvazi kërkon të takojë ndonjë zyrtar të këtij dikasteri qeveritar. Për ta ka një kërkesë të vetme. Një ilaç e kërkon që mos t’i deformohet trupi.
Axha Skender i cili ka 58 vjet jetë, tash e disa vite vuan nga një sëmundje reumatike. Si pasojë e sëmundjes, atij disa pjesë të trupit kanë nisur t’i deformohen. E situatën shumë më të rëndë e bën mungesa e ilaçeve bazike të cilat sado pak do ta stoponin sëmundjen dhe do t’ia ndalnin dhimbjet.
Për Nacionalen ky hallexhi ka treguar se si shteti, saktësisht Ministria e Shëndetësisë nuk po i furnizon me ilaçin bazik për trajtimin e sëmundjes së tij.
Theksojmë se bari “Etanercept” nuk gjendet në barnatoret private e as nuk mund të blihet nga jashtë nga persona individualë.
“Unë i kam tri-katër lloje të sëmundjeve (diagnoza). Gjatë luftës mu më ka rrokë kjo sëmundje të cilën e kam tash. 9/99, prej asaj kohe më ka rrokë sëmundja. Unë deri para 7-8 viteve kam qenë më i fortë. Kam punu. Për këtë terapinë që ne e marrim na kushton 500 euro në javë, 2000 euro në muaj na shkojnë vetëm për antireceptin. Kjo është një terapi që na stimulon, na forcon, dhembjet na i ndal pak, nyje, ashtin, e të gjitha”, tregon për sëmundjen Skender Ajvazi.
Përpjekjet për t’u pajisur me këtë ilaç.
“Që 6 javë s’kemi pasë terapi. Javën e kaluar i kemi marrë gjysma. Për fat e mora se jam çu herët, në 7 në mëngjes kam shku. Tjerët kush kanë shku më vonë s’kanë pasë. Sot kam pasë me marrë e nuk ka. Atë ilaç ne nuk mundemi me e ble në privat, se nuk ka. Shteti duhet me e siguru atë”, thotë ky qytetar.
Brenga e tij e vetme është frika që kjo sëmundje do t’ia deformojë trupin duke ia pamundësuar një jetesë normale.
“Që 6 vite sëmundja ka nisë me më deformu. Besoj që kushtet, stresi, më ka sjellë në këtë gjendje. Gjendja është e sigurt 1 milion për qind që nëse s’i pimë ilaçe, gjendja përkeqësohet. Na kemi me vdekë krejt, por mos të vdesim me merakun që nuk patëm terapi. Kjo gjendje po na nervozon, po na shqetëson, po kemi dhembje të padurueshme. Mos të vdesim mizorisht shkaku i mungesës së terapisë”, rrëfehet për Nacionalen ky pacient.
E nga Ministria e Shëndetësisë kanë bërë me dije se rreth 100 ampula të këtij ilaçi do të jenë në dispozicion. Nga ky numër vetëm 50 pacientë do të mund të marrin terapitë. 70 të tjerë nuk do ta kenë fatin të mjekohen.
Situatë e njëjtë ka qenë edhe javën e kaluar, ku nga rreth 114 pacientë, këtë medikament në Klinikën e Reumatologjisë e kanë marrë vetëm 60. /Nacionale.com/
