Pamje: Momenti kur Akil Gjakova ikën nga mediat me shpejtësi, s’ka vendim për paraburgim
Xhudisti Akil Gjakova është paraqitur sot para Gjykatës Themelore në Pejë, megjithatë, nuk i është caktuar masa e paraburgimit.
Kjo është konfirmuar nga zëdhënësja e Gjykatës, Tringa Zhuti, e cila ka thënë për media:
“Vendimi për kërkesën për paraburgim nuk do të merret sot. Të pandehurit do t’i zgjatet ndalimi me vendim, e pastaj gjyqtari do të vendos brenda afatit ligjor”.
Ndërkohë, Nacionale ka siguruar pamje se Gjakova ka ikur nga mediat duke përdorur shkallët emergjente, përderisa avokati po fliste para gazetarëve.
Xhudisti i njohur, dyshohet për dhunë fizike ndaj bashkëshortes së tij. Të martën, Policia e Kosovës e shpalli në kërkim. Në mbrëmje, ai do t’i dorëzohej autoriteteve pas kthimit nga Shqipëria.
Zëdhënësi i Prokurorisë së Pejës, Shkodran Nikçi, sot në “Kosova Today” tregoi se Prokoruria i kishte bërë pesë thirrje radhazi xhudistit, por që ky i fundit ka qenë i paqasshëm.
“Javën e kaluar prokuroria i ka marrë informatat për rastin që jemi duke biseduar për dhunën në familje të shkaktuar nga xhudisti. Informata kemi marrë edhe nga avokatja e viktimës, policia ishte autorizuar për arrestimin e personi në fjalë, i njëjti ka qenë i paqasshëm për organet e rendit pas katër apo pesë thirrjeve radhazi në shtëpinë e tij.” – u shpreh ai.
“Si prokurori e kemi pritur ditën e hënë pasi na është thënë nga familjarët se do dorëzohet dhe i njëjti nuk është dorëzuar, të martën është policia ka kërkuar që të kërkojë ndihmë për qytetarët për lokalizimin e të dyshuarit, më vonë kemi pranuar informatë se i njëjti është paraqitur në Vërmicë.” – tha tutje Nikçi.
