Raporti i Progresit: Kosova me stagnim shkaku i bllokadës politike, VV-ja kritikohet për sulmet ndaj mediave
Raporti i Progresit për Kosovën, ka evidentuar probleme të shumta. Duke nisur nga ato me raportet me BE-në, çështjen e sanksioneve, dialogu, bllokada politike, gjuha e rëndë ndaj mediave nga Vetëvendosje, e deri te siguria e drejtësia.
Në raportin për vitin 2025 thuhet se Kosova ka stanguar si rezultat i bllokadës politike.
“Me fillimin e fushatës zgjedhore në janar 2025, Kuvendi hyri në një periudhë pasiviteti. Pas zgjedhjeve parlamentare, dështimi i Kuvendit për t'u konstituuar ka dëmtuar seriozisht funksionimin e institucioneve kryesore demokratike. Sa i përket qeverisjes, sfidat në marrëdhëniet midis komunave dhe institucioneve qendrore vazhdojnë. Më 5 dhjetor 2024, qeveria miratoi një numër të konsiderueshëm ligjesh sipas procedurave të përshpejtuara, duke ngritur shqetësime mbi parimet demokratike. Opozita, kritike ndaj kësaj praktike, kundërshtoi një numër ligjesh në Gjykatën Kushtetuese”, thuhet në raport.
Ngërçi politik sipas raportit, ka dëmtuar funksionimin e institucioneve demokratike dhe rrezikon të minojë besimin e publikut në proceset demokratike.
“Kampanja zgjedhore gjithashtu ka ngadalësuar vendimmarrjen. Gjuha polarizuese kundër kundërshtarëve vazhdoi të përdoret në debatet politike. Që nga zgjedhjet e shkurtit, Kuvendi vazhdimisht ka dështuar të vendoset, që është një kusht paraprak për formimin e qeverisë. Për shkak të kësaj ngërçi politik, qeveria në largim është në status kujdestarie që nga 23 marsi 2025, me funksione ekzekutive të kufizuara”, është thënë tutje.
Sa u përket masave të vendosura nga BE-ja për Kosovën, është thënë se ka nisur heqja graduale e tyre, dhe se në kuadër të heqjes ka qenë edhe një takim i mbajtur në kuadër të Marrëveshjes së Stabilizim-Asociimit në korrik.
“Hapat e mëtejmë mbeten të kushtëzuar nga një ulje e qëndrueshme e tensioneve në veri. Komisioni synon t’i heqë më tej këto masa me kushtin që të arrihet një transferim i rregullt i qeverisjes lokale në veri, pas raundit të dytë të zgjedhjeve lokale dhe nëse ulja e tensioneve është e qëndrueshme”, thuhet në raport.
“Pavarësisht angazhimit të qeverisë dhe mbështetjes publike për rrugën evropiane të Kosovës, e shoqëruar me komunikim pozitiv mbi procesin e integrimit në BE, politika e brendshme ndarëse vazhdoi të pengojë zbatimin e agjendës së BE-së. Institucionet përgjegjëse për procesin e integrimit në BE mbeten në vend. Qendërzimi i agjendës së BE-së nganjëherë kufizon pronësinë politike në ministritë përkatëse dhe ngadalëson marrjen e vendimeve. Aktivitetet e integrimit në BE janë ndikuar negativisht nga kapaciteti i dobët administrativ dhe fakti që një numër i madh pozicionesh kyçe në administratën publike mbahen nga zyrtarë në detyrë”, specifikohet më tutje.
Një problem tejet i madh është situata e mediave, ku sipas raportit, Kosova nuk ka shënuar asnjë progres.
Madje, përmendet edhe gjuha e Albin Kurtit dhe VV-së ndaj mediave.
“Gjatë periudhës së raportimit, u raportuan 70 raste të sulmeve fizike dhe verbale ose kërcënimeve ndaj gazetarëve, duke përfshirë pengimin e punës së gazetarëve dhe punonjësve të mediave, kërcënime dhe përdorimin e gjuhës fyese ndaj tyre. Gjatë së njëjtës periudhë, u regjistrua edhe një rast i padisë strategjike kundër pjesëmarrjes publike (SLAPP). Gjatë fushatës zgjedhore, zyrtarë të lartë të Kosovës, përfshirë edhe Kryeministrin, përdorën gjuhë ofenduese ndaj mediave”, thuhet më tutje.
Ky raport kritikon edhe çështjen e luftimit të korrupsionit.
“Kosova është midis një faze të hershme përgatitjeje dhe një niveli të caktuar përgatitjeje në luftimin e korrupsionit dhe ka bërë përparim të kufizuar. Kosova bëri përparim të mëtejshëm në gjykimin e rasteve të korrupsionit të nivelit të lartë, gjë që rezultoi në një numër më të lartë vendimesh dhe dënimesh gjyqësore përfundimtare, ndërsa numri i përgjithshëm i hetimeve dhe dënimeve përfundimtare në rastet e korrupsionit jo të nivelit të lartë u ul”, thuhet më tutje.
