Mediat në Shqipëri konfirmojnë skandalin: Ilir Meta ishte punëtor i sigurimit të shtetit në kohën e diktaturës
Mediat në Shqipëri kanë zbardhur letrën e Autoritetit për Informim që i është drejtuar kryetares së Kuvendit atje, Lindit Nikolla.
Në dokument, emri i politikanit të lartë të shtetit rezulton të jetë i ish-presidentit Ilir Meta.
“Në vijim të kërkesave dhe propozimeve tona të mëparshme, por sidomos duke marrë nxitje nga denoncimi më i fundit i ardhur në institucion mbi pastërtinë e figurës së një prej personaliteteve më të lartë të shtetit, siç është ish-presidentit i Republikës, Ilir Metaj, i pajisur me certifikatë të pastërsisë së figurës nga Komisioni Mezini dhe Bezhani, e konformuar nga ana jonë me vendimin e autoritetit nr. 17, datë 28.04. 2017, rezulton se në fakt figuron në dokumentet e krijuara nga strukturat e ish-sigurimit të shtetit”.
Këtë dokument e kanë publikuar mediat në Shqipëri si Euroneës Albania, Top Channel, Albanian Post etj.
Sipas “dokumentit”, disa figura të rëndësishme, “si A.D, Th.S, S.H, Xh.Sh, D.Ç dhe I.M, të cilat kanë pasur certifikatë të pastërtisë së figurës, figurojnë në dokumentet e krijuara nga ish-sigurimi i shtetit, raste të cilat duhet të mbahen parasysh në vlerësimin tuaj në lidhje me miratimin nga ana e Kuvendit të propozimeve për ndryshime ligjore”.
Gjithashtu Autoriteti shkruan se, “me qëllim që situata të tilla të mos përsëriten më dhe në përndjekje të qëllimit për të mundësuar që personat që ushtrojnë detyra shtetërore aq më shumë ato subjekte që ushtrojnë detyra të larta, duhen bërë disa ndryshime në Kodin Zgjedhor”.
Një ditë më parë, Bordi i Autoritetit për Informim mbi Dosjet e Sigurimit te Shtetit, i kërkoi Kuvendit të Shqipërisë të ndryshoj ligjin mbi dosjet në vend, për shkak se favorizon politikanët e lartë dhe deputetët e Kuvendit të Shqipërisë, të cilët nuk ndëshkohen nga të qenit bashkëpunëtorë të Sigurimit të Shtetit dhe akoma më keq mbrohen me një klauzolë të veçantë, nëse kanë kaluar “filtrin” e atij që quhej Komisioni Mezini dhe me pas Bezhani pas vitit 1997.
Lidhur me këtë, ka pasur një reagim nga bashkëpunëtori i Ilir Metës, Tedi Blushi duke thënë se kanë merakun e patronazhistëve të komunizmit dhe i kërkoi që të nxjerrin çdo dokument në mënyrë që të jenë sa më transparentë.
Kush është Ilir Meta?
Ilir Meta është një ndër politikanët veteranë të Shqipërisë.
Të dielën që kaloi, Meta e përfundoi mandatin e tij si president i Shqipërisë.
Kujtojmë që ish-presidenti shqiptar, ka qenë për vite udhëheqës i partisë Lëvizja Socialiste për Integrim.
Por, këtë të marte ai ka treguar se ka themeluar një parti të re, të cilën e ka quajtur “Partia e Lirisë.
“Me mirënjohje për të gjithë delegatët për vendimin historik të themelimit të Partisë së Lirisë. Dje hodhëm hapin e parë në përmbushjen e misionit tonë për rivendosjen e Sovranitetit të plotë të popullit shqiptar nëpërmjet Referendumit”, thuhet në postimin e Metës në Facebook.
Ndryshe, Ilir Meta ka paralajmëruar rifillimin e rrugës opozitare në Shqipëri, duke deklaruar se Edi Rama, kryeministër i Shqipërisë, do të largohet sikurse Sllobodan Millosheviq, ish-diktatori i Serbisë, i akuzuar për krime lufte në Kosovë.
“Ai do të ikë si Millosheviqi, me zgjedhje dhe me protesta. Unë nuk i lë shqiptarët pa alternativë”, u shpreh dje Meta.
