Kjo grua humbi 13 anëtarë të familjes në tërmet: Nuk ka shpresë për ne, qyteti ka përfunduar

E gjithë bota e Fatima Figenit është zhdukur. Në një copë tokë të shkatërruar nga tërmeti në qytetin e shkatërruar të Adiyaman, ajo përpiqet të qëndrojë ngrohtë.

Teksa mblidhet rreth zjarrit me motrën dhe kunatin, numëron të vdekurit. “Ka pasur shumë humbje në familjen e burrit tim, nëna, babai, vëllezërit dhe motrat, kunatat, nipat, mbesat, na u shemb banesa e familjes. Ndërkohë daja, gruaja, fëmija, vjehrra humbën jetën…”

13 anëtarë të familjes së saj humbën në rrënoja. Dhjetë fëmijë mbetën pa prindër. Fatima u tregoi gazetarëve të Sky News foto të shtëpisë siç dukej para tërmetit.

Eshtrat e familjarëve tani shtrihen matanë rrugës, një shtëpi u kthye në varreza ku vdiqën të dashurit e saj, shkruan Sky.

Të gjithë ishin viktima të një tërmeti për të cilin ajo nuk ndalet së menduari. “Edhe kur jemi në këmbë na duket sikur po dridhemi”, thotë Fatima.

"Nuk ka punë. Ne jemi të falimentuar, qyteti ka mbaruar"

Në mes të traumave, gjumi është i shkurtër. Rreth tyre, shpëtimtarët [p përpiqen të nxjerrin të vdekurit, ndërsa të gjallët bëjnë gjithçka për të mbijetuar netët kur temperatura bie nën zero. “Në ditët e para dëgjuam histori të njerëzve që u nxorrën nga rrënojat, por vdiqën nga i ftohti”, thotë Fatima.

Moti i akullt nuk është sfida e vetme për të mbijetuarit. "Nuk ka punë. Ne jemi të falimentuar", thotë Habibi kunati i Fatimes.

Ai u tregon gazetarëve të Sky furgonin në të cilin ata flenë me radhë. Si mashkulli më i vjetër, Habib tani është mbajtësi kryesor i familjes për të afërmit e tij të mbijetuar, duke përfshirë dhjetë jetimë. Me shtëpinë e tyre të shkatërruar dhe punën e humbur, nuk ka të ardhme për ta në Adiyaman.

"Nuk ka shpresë për mua, ka mbaruar. Qyteti ka mbaruar", thotë Habib.

Turma njerëzish janë larguar nga Adiyaman, nuk ka energji elektrike dhe të mbijetuarit thonë se furnizimi me ujë është ndërprerë ose është i ndotur. Në shumë rrugë, vendin e shtëpive e zënë tashmë vendbanimet me çadra të siguruara nga shteti.

Pikërisht aty ku jeton tani Fatima, raportojnë gazetarët e Sky, ata takojnë Aysa Kaygusuz, e cila u tregoi strehimin qeveritar që ajo ndan me dhjetë të tjerë. Ata nuk kanë tualete apo dushe. Ajo shpjegon se njerëzit kryejnë jashtëqitjen afër vendit ku përgatitin ushqimin. Sëmundja është një shqetësim i madh tani.

"Ne nuk mund të përballemi me epideminë tani. Ata që mbijetuan do të vdesin më pas. Gjysma e qytetit ka vdekur", thotë Aysa.

Turqia tani po bën atë që mundet, por nevojat janë të mëdha. Për shumë njerëz këtu, vuajtjet duken të pafundme, përfundon Sky reportazhin. /Nacionale/