Bugajski kërkon njohjen reciproke: "Absurdit" të ambasadorit gjerman i vjen një reagim "joabsurd"
Ambasadori gjerman në Prishtinë, Jorn Rohde, ka bërë dje një postim për çështjen e targave dhe i cili ka nxitur një valë reagimesh tjera. Së fundi, reagim ka bërë edhe Janusz Bugajski.
Kryeminsitri Kurti u shpreh se përmes tensioneve në veri që ishin rrjedhojë e vendimit për targa, Serbia po përpiqej të maskonte refuzimin e saj të planit franko-gjerman. Por, jo të gjithë janë të bindur me fjalët e tij.
Ambasadori gjerman në Prishtinë, Jorn Rohde shkroi dje se “ishte absurde të rrezikoje konfrontim të dhunshëm” për çështjen e targave.
Çka tha Rohde?
Me anë të një postimi në rrjetin social Twitter, ambasadori gjerman u shpreh si vijon:
“Urgentisht vyen vullnet politik për deeskalim dhe kompromise bazuar në marrëveshjet e Brukselit! Absurde që të rrezikohet konfrontimi i dhunshëm për targa ndërsa lufta brutale po ndodh ndaj Ukrainës nga Rusia me viktima të panumërta tashmë,” – shkroi ai në Twitter.
Ai po shpërndante një postim nga Manuel Sarrazin, diplomati gjerman, që tregonte se kishte takuar Albin Kurtin, Donika Gërvallën, Besnik Bislimin e po ashtu edhe Goran Rakiqin.
Pjesëmarrës në këto takime ishte edhe vetë Rohde.
Bugajski
Eksperti i çështjeve të Ballkanit, bëri një nga reagimet serioze ndaj postimit të ambasadorit gjerman.
“Ne pamë se ku e quan Putinin thirrjet për “de-eskalim”. Sa më gjatë që BE-ja dhe ShBA-ja shtyjnë çështjen e njohjes reciproke mes Serbisë dhe Kosovës, aq më shumë Vuçiqi do të destabilizojë rajonin.” – u shpreh ai.
Në këtë kontekst duhet ndërmendur planin franko-gjerman. Ai ishte paraqitur nga Jens Ploetner, këshilltari i kancelarit federal të Gjermanisë, Olaf Scholz dhe nga Emmanuel Bonne i shtetit francez.
Por, plani franko-gjerman nuk përmbante njohjen reciproke sipas asaj që është thënë nga ana e atyre që e kanë parë këtë plan.
Kryeministri i vendit Albin Kurti e kishte parë si “një hap drejt rrugës së duhur” dhe si “bazë të shëndoshë” ndërsa kryekuvendari Glauk Konjufca ishte shprehur se “Kosova nuk e ka luksin ta refuzojë”.
Sidoqoftë, plani në fjalë është parë edhe se i jep një njohje de fakto Kosovës derisa e shtyn çështjen e njohjes formale për një periudhë të pacaktuar.
Reagimet jo aq serioze
Rohde ka nxitur me fjalë të tij edhe reagime që po i cilësojmë si jo aq serioze.
Gazetari që mbështet Kurtin, Gëzim Mekuli, e kishte cilësuar ambasadorin gjerman si “zëdhënës të Putinit” për shkak të këtyre deklaratave.
“Turp për këtë komunikim publik. Turp të kesh z. Ambasador! Ambasadori gjerman sot megafon i Putinit!” – shkruante ai.
Amerika
Por, edhe Amerika ka shprehur pak a shumë qëndrime të njëjta në lidhje me këtë çështje. Ambasadori amerikan në Prishtinë, Jeff Hovenier, e kishte cilësuar shtyrjen e vendimit për targa si “kërkesë specifike e urgjente” derisa i kishte bashkëngjitur edhe kërkesën për Asociacionin e komunave me Shumicë Serbe.
Në anën tjetër, edhe Departamenti amerikan i Shtetit ka shprehur “zhgënjim e shqetësim” në lidhje me këtë çështje.
Qindra zyrtarë serbë kanë braktisur institucionet e Kosovës duke ngritur shumë pikëpyetje për rrugën që e pret përpara Qeverinë e Kosovës.
