Britanikët u thanë gjermanëve: Nuk jeni vetëm, lejoni që tanket Leopard të dërgohen në Ukrainë

Britania e Madhe i bëri thirrje sot Gjermanisë që të lejojë dërgimin e tankeve Leopard në Ukrainë, duke theksuar se kjo mund të inkurajojë vendet e tjera të ofrojnë mbështetje dhe Berlini nuk do të veprojë i vetëm. “Dihet se Polonia me sa duket është shumë e interesuar të dhurojë Leopardë, ashtu si Finlanda”, tha Sekretari Britanik i Mbrojtjes Ben Wallace në parlament.

"E gjithë kjo varet aktualisht nga vendimet e qeverisë gjermane. Jo vetëm nëse Gjermania do të dërgojë Leopardët e saj, por nëse do t'u japë leje të tjerëve (për të bërë të njëjtën gjë). Unë u bëj thirrje kolegëve të mi gjermanë ta bëjnë këtë," shtoi Wallace.

"Gjermanët nuk janë vetëm"

Ministrja gjermane e Mbrojtjes Christine Lambrecht dha dorëheqjen sot pasi qeveria e saj u vu nën presion për të lejuar aleatët të dërgonin tanke në Ukrainë, në fillimin e asaj që mund të jetë një javë vendimtare për planet perëndimore për të rifurnizuar Kievin.

Gjermania i ka rezistuar deri më tani një lëvizje të tillë, duke thënë se tanket perëndimore duhet të dërgohen në Ukrainë vetëm nëse ka marrëveshje midis aleatëve kryesorë të Kievit, veçanërisht Shteteve të Bashkuara.

"Unë e di se ka pasur shqetësime në organin politik gjerman dhe se ata nuk duan të shkojnë vetëm. Ata nuk janë vetëm", tha Wallace. Ai tha se shkalla e mbështetjes do të bëhet e qartë në një takim të aleatëve të Ukrainës në Ramstein, Gjermani, të premten. /Nacionale/