Asnjë komunë e qeverisur nga VV-ja s`është renditur në top 10-she të indeksit për transparencë
Instituti Demokratik i Kosovës(KDI) sot ka publikuar Indeksin e Transparencës për Qeverisjen Komunale për vitin 2022. Të gjeturat e indeksit tregojnë se Skenderaj është shpallur komuna më transparente në vend. Në bazë të vlerësimeve të bëra del se komuna që udhëhiqet nga Fadil Nura i PDK-së, ka marrë 92.63 pikë nga 100 sa ka qenë maksimumi.
Ajo që bije në sy në tabelën e prezantuar është se në 12 vendet e para nuk është renditu asnjë komunë që qeveriset nga Lëvizja Vetëvendosje, parti kjo që qeverisë edhe me vendin.
Ndonëse kryetarët e Kamenicës, Podujevës, Gjilanit dhe Shtimes, gjatë fushatës zgjedhore kishin premtuar se do të jenë kampion të transparencës, duke se janë larg arritje se synimit të tyre.
Komuna e Kamenicës, e cila udhëhiqet nga Kadri Rahimaj, është renditur si e 13-ta në këtë indeks, duke mbledhur 81.25 pikë.
Shumë më poshtë është renditur komuna e Shtimes. Komuna e Qemajl Aliu ka marrë 77.31 pikë dhe është renditur në vendin e 18.
Në vend më poshtë ka zënë vend Gjilani i Alban Hysenit, duke marrë 74.63 pikë.
Kurse, në vendin e 23 renditet komuna e Podujevës, e cila qeveriset nga Shpejtim Bulliq. Kjo komuna ka marrë 71.43 pikë nga fushat e vlerësuara.
Gjetjet e këtij indeksi tregojnë se komuna që qeverisen nga partitë opozitare janë renditur më mirë.
Në 10 vendet e para renditen 6 komuna të cilat qeverisen nga Partia Demokratike e Kosovës. Në top 10-she renditen edhe dy komuna të LDK-së dhe dy të AAK-së.
Në vendin e ditë si komuna më transparent është renditur ajo e Lipjanit me 91.13 pikë, kurse në vendin e tretë komuna e Mitrovicës më 91.13pikë.
Pas tyre renditet Prizreni (90.63 pikë), Drenasi (89.88 pikë), Prishtina (89.13 pikë), Rahoveci (88.94), Ferizaj (86.94 pikë), Gjakova (85.38 pikë) dhe Hani i Elezit (83.62 pikë), dhe Dragashi (82.73 pikë).
Kriteret e transparencës
Indeksi i transparencës, i cili është realizura në bashkëpunim me Transparency International Slovakia, në vlerësimin e komunave ka marrë parasysh 87 indikatorë për tetë shtylla.
Shtyllat ku janë vlerësuar komunat janë transparenca në shpenzimet publike përmes prokurimit publik, transparenca buxhetore, transparenca në grantet dhe subvencionet komunale, përfshirja e qytetarëve në vendimmarrjen komunale, qasja në dokumente publike, përgjegjshmëria e komunave për të adresuar risqet e korrupsionit dhe konfliktin e interesit, menaxhimi i pronës komunale, si dhe transparenca e ndërmarrjeve dhe organizatave publike në pronësi të komunave.
Në prezantimin e të gjeturave, menaxherja e projektit në KDI, Diana Metushi-Krasniqi, ka deklaruar se komunat çdo vit po vetëdijesohen në këtë fushë.
“Është për t’u vlerësuar fakti se komunat nga viti në vit po dëshmojnë se janë më të përgjegjshme në publikimin e informatave dhe dokumenteve për publikun, duke shënuar rritje të nivelit të transparencës nga 𝟱𝟲% 𝗻𝗲̈ 𝘃𝗶𝘁𝗶𝗻 𝟮𝟬𝟮𝟭 𝗻𝗲̈ 𝟲𝟴% 𝗻𝗲̈ 𝘃𝗶𝘁𝗶𝗻 𝟮𝟬𝟮𝟮, megjithatë, ueb faqet e komunave po vazhdojnë të jenë shpesh të paqasshme si rezultat i problemeve teknike. Kjo i zbeh përpjekjet e komunave për transparencë, ndërkohë që i dekurajon qytetarët të qasen në informacione dhe të kërkojnë llogaridhënie nga komunat e tyre”, ka thënë ajo.
Sipas këtij indeksi, 15 komunat me rritjen më të lartë të transparencës krahasuar me vitin 2021 janë Skenderaj, Istogu, Deçani, Prizreni, Malisheva, Kamenica, Hani i Elezit, Dragashi, Drenasi, Klina, Juniku, Suhareka, Obiliqi, Lipjani dhe Graçanica.
Në fund të raportit, KDI-ja ka publikua edhe disa rekomandime, ku i inkurajon të gjitha komunat që t`i analizojnë të gjeturat e këtij indkesi në mënyrë që ta përmirësojnë nivelin e transparencës për vitin në vijim.
