“Sindikalistët e PAN-it”, Çitaku: Kurti e ka problem ta kuptojë që ka sindikata të cilat nuk nënshtrohen
Po vazhdojnë kritikat ndaj kryeministrit, Albin Kurti që i quajti sindikalistët si “sindikata të PAN-it".
Një reagim për këtë e ka bërë edhe nënkryetarja e PDK-së, Vlora Çitaku, e cila ka thënë se Kurti po e ka problem të kuptojë që sindikatat, media, organizatat nuk nënshtrohen ndaj tij.
“Si duket e ka problem të kuptojë që ka njerëz që vendimet i marrin vet. Si duket e ka telashe me e pranu që jo të gjithë ia kanë frikën.”, ka shkruar ajo.
Shkrimi i saj:
Dobët Kryeministër, dobët.
Në vend se të ulet e të bëjë zgjidhje, Kurti paska vendosur edhe sot të thumbojë mësueset dhe arsimtarët tanë.
Njëhere, njerëzit e VV e quajtën kryesindikalistin njeri të Serbisë, e sot, Kryeministri i paska quajtur sindikatat “ sindikata të PAN-it.”
Si duket Kurti e ka problem ta kuptojë që në Kosovë ka organizata, sindikata, media, shoqata të pavarura, të cilat nuk nënshtrohen. Si duket e ka problem të kuptojë që ka njerëz që vendimet i marrin vet. Si duket e ka telashe me e pranu që jo të gjithë ia kanë frikën.
Kryeministër, ju jeni Kryeministër i Kosovës, jo i VV-së. Fatkeqësisht nuk po silleni si i tillë.
Jemi me 25 shtator, e fëmijët tanë janë në shtëpi. Hapi dyert e shkollave Kryeministër. Çelësat i ke në dorë ti.
