Kurti kërkon falje për huqjen e detyrës së thjeshtë matematikore: I gëzuar që nuk isha nxënës në atë çast

Kryeministri i Kosovës, Albin Kurti, ka kërkuar falje publike pasi bëri një gabim në zgjidhjen e një problemi elementar matematikor gjatë një vizite në një shkollë fillore.

Gjatë vizitës në njërën nga klasat e shkollës fillore "Ali Hadri", Kurti u afrua për të zgjidhur një ekuacion të thjeshtë. Megjithatë, në vend që të zgjidhte saktë ekuacionin, Kurti gabimisht e llogariti rezultatin si x=5.

Ai pranoi se po të ishte student në klasën e tyre, nuk do të kishte marrë një notë kaluese.

Postimi i Kurtit:

Kërkimfalje nxënësve të klasës 7/1 të shkollës fillore “Ali Hadri”

Të dashur nxënës,

Ju falemnderit për mikpritjen e përzemërt në ndërtesën e re të shkollës suaj. Gëzimi juaj sot më mbushi me mall për bankat shkollore. Por, më duhet të them që tash jam i gëzuar që nuk isha nxënës në atë çast, sepse nuk do të merrja notë kaluese. Ekuacioni i thjeshtë matematikor m’u duk që në sekondën e parë që e ka zgjidhjen x=5; pra pesë, porsi pesëshet që ua dëshiroj juve. Po të mendoja pak, do ta shihja që zgjidhja e saktë është x=0, por në atë rast, nuk besoj që do të merrja mundin të merrja shkumësin e të shkruaja në dërrasën e klasës suaj. Ju kërkoj falje. Zgjidhja e atij ekuacioni, ashtu qysh ju e dini më mirë se kryeministri i juaj, është x=0.

Ju përshëndes e ju dua fort,

Albini