Zjarr në një shtëpi me persona me aftësi të kufizuara në Francë, 11 të zhdukur

Të paktën njëmbëdhjetë persona janë zhdukur pas zjarrit në një shtëpi ku kishte persona me aftësi të kufizuara në Wintzehnheim, sipas autoriteteve në prefekturën Haut-Rhin, në pjesën lindore të Francës.

Gati 80 zjarrfikës kanë shkuar në vendin e ngjarjes, pasi shërbimet emergjente u njoftuan në orën 6 e 30 minuta të mëngjesit të së mërkurës, raporton televizioni BBC.

Duket se zjarri kishte nisur në një pronë që përdorej nga një organizatë bamirëse që u ofron ndihmë të rinjve me aftësi të kufizuara.

Raportohet se 17 persona janë evakuuar, ndërsa të paktën një është dërguar në spital.

Duke konfirmuar se operacioni i shpëtimit ishte duke vazhduar, ministri i Punëve të Brendshme, Gerald Darmanin, tha se ka gjasa që nga zjarri do të ketë disa viktima në qytezën afër kufirit me Gjermaninë.

Njëmbëdhjetë të zhdukurit janë pjesë e një grupi personash nga Nancy, gjithashtu në pjesën lindore të Francës, sipas agjencisë “Reuters”.