Zgjerohet vala e sulmeve kibernetike ndaj ujësjellësve në ShBA, dyshimet drejtohen nga Irani

Të paktën shtatë shtete amerikane kanë raportuar incidente kibernetike ndaj sistemeve të furnizimit me ujë. Autoritetet thonë se nuk ka prova që cilësia e ujit të pijshëm është cenuar, ndërsa hetimet për autorët vazhdojnë.

Sulmet kibernetike ndaj sistemeve të furnizimit me ujë në Shtetet e Bashkuara janë shtrirë në të paktën shtatë shtete, ndërsa autoritetet amerikane po hetojnë mundësinë që pas tyre të qëndrojnë aktorë të lidhur me Iranin, raporton The New York Times.

Minesota ishte shteti i parë që raportoi publikisht incidentet, ndërsa autoritetet e Miçiganit kanë konfirmuar se edhe disa komunitete në këtë shtet janë përballur me aktivitet të ngjashëm.

Deri tani nuk ka të dhëna që furnizimi me ujë të jetë ndryshuar ose që uji të jetë bërë i pasigurt për konsum. Megjithatë, autoritetet shtetërore dhe lokale janë vendosur në gatishmëri të lartë për shkak të dobësive në pajisjet kompjuterike që përdoren për monitorimin dhe rregullimin e cilësisë së ujit, niveleve të trajtimit kimik dhe presionit.

Sipas The New York Times, zyrtarët ende nuk kanë arritur në një përfundim përfundimtar se Irani është përgjegjës. Vlerësimi mbetet paraprak dhe hetuesit nuk kanë siguruar ende prova të pakundërshtueshme digjitale.

Megjithatë, Irani konsiderohet i dyshuari kryesor. Zyrtarët amerikanë thonë se Teherani ka intensifikuar operacionet kibernetike kundër objektivave amerikane, izraelite dhe të Lindjes së Mesme që prej fillimit të luftës pesë muaj më parë. Mungesa e një motivi financiar e bën më pak të mundshëm skenarin e një sulmi të zakonshëm kriminal.

Trump kundërshton vlerësimet për përfshirjen e Iranit

Presidenti amerikan Donald Trump e minimizoi të premten mundësinë e përfshirjes iraniane, duke sugjeruar se përgjegjësia lidhej me Minesotën.

“I think Minnesota is behind it,” tha Trump, sipas The New York Times. “I don’t think there was an Iranian cyberattack.”

Guvernatori demokrat i Minesotës, Tim Walz, e hodhi poshtë pretendimin dhe paralajmëroi se incidentet tregojnë mënyrën se si zhvillohet lufta moderne.

Pas deklaratave të Trumpit, zyrtarë federalë thanë privatisht se Irani vazhdon të jetë i dyshuari kryesor, por theksuan se hetimi është ende në fazat fillestare. Përcaktimi i përgjegjësisë në sulmet komplekse kibernetike mund të kërkojë muaj dhe, në disa raste, mund të mos arrihet asnjëherë me siguri të plotë.

Kryetari i qytetit Braham, në veri të Minneapolisit, Nate George, tha se autoritetet lokale po marrin informacione nga shteti i Minesotës dhe Byroja Federale e Hetimit, FBI.

“They are pretty sure it’s Iranian actors,” tha ai për The New York Times, duke shtuar se zyrtarët hezitojnë ta deklarojnë publikisht këtë përfundim.

FBI: Disa operacione të ujësjellësve u dëmtuan

Në një njoftim të përbashkët, FBI-ja dhe Agjencia Amerikane për Mbrojtjen e Mjedisit thanë se të paktën shtatë shtete kishin raportuar incidente që prej fillimit të javës. Një pjesë e aktivitetit kibernetik kishte penguar funksionimin normal të sistemeve të ujit.

Autoritetet federale nuk kanë bërë publike emrat e të gjitha shteteve të prekura.

Zëdhënësi i qeverisë së Miçiganit, Dale George, konfirmoi se një numër i vogël komunitetesh kishin raportuar aktivitet në përputhje me përshkrimet e agjencive federale. Sipas tij, sistemet e prekura vazhduan të funksiononin në mënyrë të sigurt dhe nuk u regjistruan pasoja të njohura për shëndetin publik.

Agjencia Amerikane për Sigurinë Kibernetike dhe të Infrastrukturës, CISA, paralajmëroi se hakerët po godasin ndërmarrje ujësjellësi të të gjitha përmasave. Agjencia rekomandoi që pajisjet e cenueshme të kontrollit të shkëputen nga interneti.

Në disa raste, aktiviteti kibernetik ka detyruar autoritetet të lëshojnë njoftime për zierjen e ujit dhe të kalojnë përkohësisht në operim manual.