Zelensky: Trump rrezikon të jetë ‘president i dështuar’ nëse imponon marrëveshje të keqe ndaj Ukrainës

Volodymyr Zelensky paralajmëroi në një intervistë për The Guardian se nëse Donald Trump do të siguronte fitoren në zgjedhjet e nëntorit dhe do të zbatonte një marrëveshje të pafavorshme paqeje për Ukrainën, ai do të rrezikonte të njolloste trashëgiminë e tij si president dhe të zvogëlonte ndikimin global të Shteteve të Bashkuara. Zelensky pranoi se i mungonte një strategji konkrete në rast të kthimit të Trump në Shtëpinë e Bardhë.

Trump ishte mburrur më parë për përfundimin e shpejtë të konfliktit, por ndihmësit e tij kanë lënë të kuptohet për një plan që mund të sjellë dhënien e rajoneve lindore të Ukrainës, përfshirë Krimenë, Rusisë – një propozim i kundërshtuar ashpër nga ukrainasit.

Presidenti ukrainas shprehu shqetësimin për ndikimin shkatërrues që një tërheqje e mbështetjes do të kishte në aftësinë e Ukrainës për të mbrojtur veten.

“Ukraina, duarzbathur, pa armë, nuk do të jetë në gjendje të luftojë një ushtri shumëmilionëshe [ruse]”, tha Zelenskiy për Guardian.

Ai paralajmëroi për pasoja të rënda si për pozitën globale të ShBA-së, ashtu edhe për Trumpin personalisht, duke sugjeruar se një armëpushim i ndërmjetësuar nga Trump vetëm do ta inkurajonte Putinin për të shfrytëzuar më tej situatën, duke minuar përfundimisht udhëheqjen e ShBA-së dhe duke i hapur rrugën regjimeve autoritare.

“A dëshiron ai të bëhet një president humbës? E kuptoni se çfarë mund të ndodhë?” tha ai.

Ai parashikoi se Vladimir Putin do të shkelte çdo marrëveshje të ndërmjetësuar nga Trump. "Armëpushimi është një kurth," tha ai.

Pas një pauze, Putini do të "shkonte më tej", duke e poshtëruar Trumpin dhe duke e bërë atë të dukej "shumë i dobët" në sytë e botës, shtoi ai më tej.

Duke parashikuar fitoren e mundshme të Trump ndaj Joe Biden, spekulohet gjerësisht se ndihma ushtarake e SHBA për Ukrainën do të pushojë.

Zelensky theksoi se Ukraina nuk do t'i nënshtrohet presionit rus, duke hedhur poshtë çdo ultimatum që rrezikon integrimin e saj evropian ose aspiratat në NATO.