Trump i vendos Hamasit afat për t’iu përgjigjur planit të paqes, ndërsa Izraeli thotë se do t’i rezistojë shtetësisë palestineze
Donald Trump ka paraqitur një plan paqeje për t’i dhënë fund luftës në Gaza dhe ka caktuar një afat prej “tre deri në katër ditësh” që Hamasi të japë përgjigje.
“Do të jetë një fund shumë i trishtë” nëse Hamasi e refuzon marrëveshjen, tha ai para gazetarëve jashtë Shtëpisë së Bardhë të martën, raporton BBC.
Hamasi ende nuk i është përgjigjur planit të Trump-it, por ministria e jashtme e Katarit ka thënë se grupi po e shqyrton atë “me përgjegjësi”.
Plani me 20 pika, i shpallur gjatë vizitës së kryeministrit izraelit Netanyahu në Shtëpinë e Bardhë të hënën, parashikon përfundimin e menjëhershëm të operacioneve ushtarake dhe lirimin e të gjithë pengjeve brenda 72 orëve.
Ai gjithashtu përcakton se Hamasi nuk do të ketë rol qeverisës në Gaza. Në vend të kësaj, Rripi do të qeverisej nga një “komitet palestinez teknokrat, jopolitik”, dhe një “Bord Paqeje” i përbërë nga liderë ndërkombëtarë.
Një zyrtar i lartë i Hamasit i ka thënë BBC-së se grupi ka gjasa ta refuzojë propozimin e Trump-it, duke thënë se ai “i shërben interesave të Izraelit” dhe “i injoron ato të popullit palestinez”.
