Raportohet për të paktën 30 pjesëtarë të vrarë të forcave qeveritare nga rebelët Houthi në Jemen
Së paku 30 pjesëtarë të forcave qeveritare jemenase raportohet të jenë vrarë nga sulmet e rebelëve Houthi ndaj kampeve ushtarake në pjesën qendrore të vendit.
Burimet thanë se raketa e dronë goditën disa kampe të menaxhuara nga Forcat Emergjente në zonën al-Ruëaik të provincës Marib dhe në zonën al-Abr të Hadramaët-it, raporton televizioni BBC.
Ministri i Shëndetësisë, Qasim Bahibah, e dënoi sulmin “e pabesë”, duke thënë se për qëllim e kishte destabilizimin e sigurisë dhe stabilitetit. Ai nuk ofroi ndonjë shifër të të vrarëve.
Një zëdhënës i lëvizjes Houthi, e cila kontrollon pjesë të mëdha të Jemenit Veriperëndimor dhe mbështetet nga Irani, tha se kishte vënë në shënjestër “grumbullime të mëdha ushtarake saudite” që po përgatiteshin për ofensivë. Një koalicion i udhëhequr nga Arabia Saudite e ka mbështetur Qeverinë e Jemenit gjatë luftës civile të vendit.
Nuk pati komente të menjëhershme nga ky koalicion apo nga Arabia Saudite.
Misioni i Shteteve të Bashkuara në Jemen tha se sulmet e grupit Houthi janë “frikacake” dhe një shembull tjetër i atij që e quajti “terrorizëm i tyre kundër popullit jemenas”.
Jemeni është shkatërruar nga një luftë civile që nisi në vitin 2014, kur grupi Houthi e dëboi qeverinë nga kryeqyteti Sanaa. Konflikti u përshkallëzua më 2015, pasi koalicioni i udhëhequr nga sauditët ndërhyri në përpjekje për ta rikthyer pushtetin qeveritar./Nacionale
