Përmbledhje e zhvillimeve të deritanishme nga konflikti Rusi-Ukrainë

3 vjet më parë

nga Miranda Shala

Ndërsa lufta në Ukrainë ka hyrë në muajin e tetë, në vazhdim ju sjellim disa nga zhvillimet më kyçe të ditës nga ky konflikt.

Për herë të parë, Rusia ka vënë në shënjestër Zaporizhzhia-n me "dronë kamikazë" nga Irani, të mbushur me eksploziv, pasi numri i të vdekurve nga një sulm me raketa në një ndërtesë apartamentesh në qytet të enjten u rrit në 11.

Në rajonin verilindor të Kharkiv, ku forcat ukrainase rifituan një pjesë të madhe të tokës në shtator, pas largimit të trupave ruse janë gjetur trupat e 534 civilëve, përfshirë 19 fëmijë, tha në një konferencë Serhiy Bolvinov i Policisë Kombëtare në Kharkiv.

Sipas gazetës RBC, Rusia ka shkarkuar komandantin e distriktit të saj ushtarak lindor, gjeneral kolonelin Alexander Chaiko. Largimi i raportuar i Chaikos shënon shkarkimin më të fundit në një seri zyrtarësh të lartë që janë shkarkuar pas disfatave dhe poshtërimeve në luftën në Ukrainë.

Joe Biden ka paralajmëruar se bota mund të përballet me “Armagedonin” nëse Vladimir Putin përdor një armë taktike bërthamore në përpjekje për të fituar luftën në Ukrainë. Presidenti amerikan bëri komentet e tij më të hapura deri më tani për kërcënimin e luftës bërthamore, duke thënë se ishte katastrofa bërthamore më e afërt që i ka ardhur botës për gjashtëdhjetë vjet.

Çmimi Nobel për Paqe 2022 i është dhënë avokatit të të drejtave të njeriut Ales Bialiatski nga Bjellorusia, organizatës ruse të të drejtave të njeriut Memorial dhe organizatës ukrainase të të drejtave të njeriut Qendra për Liritë Civile.

Burimet ukrainase po përpiqen të sqarojnë se çfarë donte të thoshte Presidenti Volodymyr Zelensky dje kur foli për "sulme parandaluese" të nevojshme për të ndaluar Rusinë të përdorë armët taktike bërthamore në Ukrainë. Ndërsa, ministri i Jashtëm i Rusisë, Sergey Lavrov, i ka shfrytëzuar komentet, duke i interpretuar ato si një thirrje për NATO-n për të përdorur armë bërthamore kundër Rusisë dhe tha se komentet tregojnë pse "operacioni special ushtarak" i Rusisë brenda kufijve të Ukrainës ishte i nevojshëm.

Duke cituar inteligjencën amerikane, Washington Post, ka raportuar se një anëtar i rrethit të brendshëm të Vladimir Putin është përballur drejtpërdrejt me presidentin rus për gabimet dhe dështimet në luftën në Ukrainë.

Shtabi i forcave të armatosura të Republikës së vetëshpallur Popullore të Donetskut (DPR) ka pretenduar se ka marrë tre vendbanime nga forcat ukrainase në Donetsk.

Të paktën pesë persona janë vrarë dhe po aq janë plagosur pasi forcat ukrainase goditën një autobus ndërsa granatonin një urë strategjike në pjesën e kontrolluar nga Rusia të rajonit jugor Kherson të Ukrainës, ka raportuar agjencia ruse e lajmeve Tass.

Udhëheqësi i Koresë së Veriut Kim Jong Un e ka uruar Putinin për ditëlindjen e tij të 70-të, duke e duartrokitur për “lidershipin e tij të dalluar dhe vullnetin e fortë” në shenjën e fundit të thellimit të lidhjeve midis dy vendeve.