Netanyahu i kërcënon rebelët Houthi me “çmim të lartë” pas raketës në Izrael
Kryeministri izraelit, Benjamin Netanyahu, ka paralajmëruar se rebelët Houthi të Jemenit do të paguajnë “çmim të lartë”, pasi ky grup e mori përgjegjësinë për sulmin e parë me raketë balistike ndaj Izraelit dhe kreu i rebelëve paralajmëroi se do të ketë sulme më të mëdha.
Raketa, për të cilën rebelët Houthi pretenduan se ishte raketë e avancuar hipersonike tokë – tokë, i aktivizoi sirenat e alarmit për sulme ajrore në mbarë Izraelin rreth orës 6 e 30 minuta të mëngjesit, ndërsa mediat lokale publikuan pamje të njerëzve që nguteshin për të arritur në strehimore në aeroportin ndërkombëtar “Ben Gurion” në juglindje të qytetit Tel-Aviv, raporton gazeta “The Guardian”.
Sipas raportimeve, raketa goditi një zonë të hapur në pyllin Ben Shemen, duke shkaktuar zjarr afër Kfar-Danielit. Nuk ka pasur raportime për pasoja në njerëz ose dëme.
Ushtria izraelite është duke zhvilluar hetim për të përcaktuar nëse zjarri ishte rezultat i copëzave të shkaktuara nga raketat penguese që ishin hedhur drejt predhës, apo nëse objekti i armikut e kishte kaluar me sukses mbrojtjen ajrore izraelite, siç kanë pretenduar rebelët nga Jemeni.
Gjatë një takimi të kabinetit qeveritar të dielën, Netanyahu dha shenjë për kundërpërgjigje ushtarake. “Këtë mëngjes, Houthi-t hodhën një raketë tokë – tokë nga Jemeni në territorin tonë. Ata do të duhej ta kenë ditur deri tani se ne ngarkojmë me çmim të lartë për çfarëdo përpjekjeje për të na lënduar” – tha ai.
“Ata që kanë nevojë për një përkujtim për këtë çështje, ftohen që ta vizitojnë portin Hodeidah” – shtoi kryeministri izraelit, duke iu referuar qytetit jemenas me dalje në Detin e Kuq, të cilin aeroplanët luftarakë izraelitë e bombarduan në korrik, pasi rebelët Houthi e kishin marrë përgjegjësinë për një sulm me dron që kishte lënë të vrarë një civil në Tel-Aviv.
