Në përmbytjet në Nigeri që nga qershori, 500 njerëz kanë vdekur dhe 1.4 milionë janë zhvendosur
Më shumë se 500 njerëz kanë vdekur që nga qershori në përmbytjet më të mëdha të një dekade të Nigerisë pasi reshjet e dendura detyruan 1.4 milionë njerëz të largohen nga shtëpitë e tyre, thanë autoritetet.
Që nga fillimi i sezonit të shirave, shumë pjesë të vendit më të populluar të Afrikës janë shkatërruar nga përmbytjet, duke nxitur frikën e pasigurisë ushqimore dhe inflacionit.
Më shumë se 1.4 milionë njerëz u zhvendosën
Më shumë se 1.4 milionë njerëz janë zhvendosur, rreth pesëqind kanë vdekur dhe 1,500 janë lënduar nga përmbytjet, sipas Ministrisë Nigeriane të Çështjeve Humanitare. Më shumë se 45,000 shtëpi dhe 70,000 hektarë tokë të punueshme u shkatërruan plotësisht. Zëdhënësi i Agjencisë Shtetërore të Menaxhimit të Fatkeqësive Manzo Ezekiel tha se të dhënat ishin nga fundjava e kaluar.
Sezoni i shirave fillon në qershor, por përmbytjet ishin veçanërisht vdekjeprurëse në gusht dhe shtator, shtoi Ezekieli. Të premten, 76 persona humbën jetën kur një varkë u mbyt në shtetin Anambra për shkak të një rritjeje të papritur të nivelit të ujit të lumit Niger.
Është paralajmëruar vazhdimi i reshjeve
Sinoptikanët parashikojnë vazhdimësi të reshjeve për javët në vijim, të cilat mund të shkaktojnë dëme edhe më të mëdha. Sezoni i shirave zakonisht përfundon në nëntor në veri të vendit dhe në dhjetor në jug. Përveç shiut, përmbytjet janë pasojë e hapjes së digave që supozohet të parandalojnë përmbytjet.
Në vitin 2012, përmbytjet masive vranë 363 njerëz dhe shpërngulën 2.1 milionë. Afrika në jug të Saharasë është veçanërisht e prekur nga ndryshimet klimatike dhe ekonomitë e shumë prej vendeve atje po vuajnë për shkak të luftës midis Rusisë dhe Ukrainës.
Në Nigeri, e cila ka një popullsi prej rreth 215 milionë banorësh, prodhuesit e orizit kanë paralajmëruar se çmimi i orizit mund të rritet ndjeshëm këtë vit për shkak të përmbytjeve shkatërruese dhe importet e tij janë ndaluar për të inkurajuar prodhimin vendas. /Nacionale/
