NATO: Ne po dërgojmë sisteme të reja të mbrojtjes ajrore në Ukrainë

Aleatët perëndimorë njoftuan sot se do të dorëzojnë sisteme të reja të mbrojtjes ajrore në Ukrainë dhe konfirmuan se do të vazhdojnë të ndihmojnë fuqishëm forcat ukrainase në luftën kundër Rusisë.

Kjo u bë e ditur në takimin e Grupit të Kontaktit për Mbrojtjen e Ukrainës, i cili u themelua me iniciativën e Shteteve të Bashkuara pas sulmit rus në Ukrainë dhe që u mblodh në margjinat e takimit të ministrave të mbrojtjes të vendeve anëtare të NATO-s sot dhe nesër në Bruksel.

Ka më shumë se 50 vende në Grupin e Kontaktit, duke përfshirë 30 anëtarë të NATO-s. Ministri ukrainas i Mbrojtjes Oleksiy Reznikov mori pjesë në takim.

Reznikov: Kjo është një epokë e re

Sekretari i Përgjithshëm i NATO-s Jens Stoltenberg tha se shpërndarja e këtyre sistemeve, të cilat mund të neutralizojnë raketat ruse në qiellin e Ukrainës, është një "prioritet".

Ministri ukrainas i Mbrojtjes Reznikov përshëndeti një "epokë të re të mbrojtjes ajrore" me ardhjen e paralajmëruar të "sistemit Iris-T nga Gjermania" dhe dërgimin e afërt të "NASAMS amerikane". Ministri amerikan i Mbrojtjes Lloyd Austin dënoi në fillim të takimit sulmet ruse ndaj qyteteve të Ukrainës, ndaj objektivave që nuk kanë qëllim ushtarak.

"Bota e ka parë edhe një herë ligësinë dhe mizorinë e luftës së Putinit"

“E gjithë bota sapo ka parë edhe një herë ligësinë dhe mizorinë e luftës së Putinit, të rrënjosura në agresion dhe të nxitur nga një përbuzje e thellë për rregullat e luftës”, tha Austin.

"Por sulmet e fundit ruse vetëm sa thelluan vendosmërinë e popullit ukrainas dhe bashkuan më tej vendet e vullnetit të mirë nga të gjitha pjesët e botës", shtoi ai. /Nacionale/