Kryeministri portugez jep shembull: Ministri dyshohet për korrupsion, shefi i tij jep dorëheqje
Kryeministri i Portugalisë, Antonio Costa, dha dorëheqje të martën, pasi qeveria e tij u përfshi në një hetim të gjerë korrupsioni, duke shkaktuar shok politikën zakonisht të qetë të këtij shteti të BE-së.
Udhëheqës i Partisë Socialiste nga viti 2015, 62-vjeçari Costa pretendoi se personalisht është i pafajshëm, por tha në një fjalim në televizion tha: “Në këto rrethana, pa dyshim, unë ia kam paraqitur dorëheqjen time presidentit të republikës.”
Njoftimi i tij erdhi disa orë pas arrestimit të shefit të stafit të kabinetit nga policia, ndërsa disa ndërtesa publike e prona të tjera u bastisën si pjesë e këtij hetimi, raporton agjencia “Associated Press”.
Zyra e Prokurorit të Shtetit tha se Gjykata Supreme ishte duke i ekzaminuar “përdorimin e emrit të kryeministrit nga të dyshuarit dhe përfshirjen e tij” gjatë kryerjes së veprave të ndaluara të pretenduara. Në njoftim thuhet se në mesin e të dyshuarve janë edhe ministri i Infrastrukturës, Joao Galamba, dhe drejtori i një agjencie mjedisore.
Costa u përlot gjatë fjalimit, përderisa e falënderoi familjen e vet për mbështetjen.
“Unë i besoj plotësisht sistemit të drejtësisë. Dua t’u them portugezëve sy më sy se asnjë akt i paligjshëm ose madje as i qortueshëm nuk peshon mbi ndërgjegjen time”- tha ai, duke shtuar se pranon që “nuk është mbi ligjin”.
“Dinjiteti i zyrës së kryeministrit nuk është i pajtueshëm me asnjë dyshim ndaj integritetit të tij, sjellës së mirë e aq më pak me ndonjë dyshim se është kryer ndonjë akt kriminal”- shtoi Costa.
Një gjykatës hetues kishte lëshuar fletarrestime për Vitor Escaria-n, shef i stafit të kabinetit, për kryetarin e qytezës Sines dhe për tre të tjerë për shkak të rrezikut për t’u larguar nga vendi dhe për t’i mbrojtur provat, thuhet në një deklaratë të Zyrës së Prokurorit.
