Këta janë kandidatët për të pasuar Johnson, garë e ngushtë mes tyre
Tetë kandidatë do të jenë në fletëvotim kur deputetët konservatorë të fillojnë votimin të mërkurën për të zgjedhur pasardhësin e kryeministrit Boris Johnson, njoftoi të martën kryetari i Komitetit të 1922, Graham Brady.
Johnson u detyrua të jepte dorëheqjen pasi dhjetëra anëtarë të administratës së tij dhanë dorëheqjen në shenjë proteste pas një sërë skandalesh.
Rishi Sunak, Liz Truss, Tom Tugendhat, Kemi Badenoch, Penny Mordaunt, Jeremy Hunt, Nadhim Zahawi dhe Suella Braverman siguruan 20 nënshkrimet nga kolegët deputetë të nevojshëm për të hyrë në garë.
Momente përpara shpalljes në dhomën e Komitetit 1922, organi që mbikëqyr zgjedhjen e pasuesit të Johnson, ish-sekretari i shëndetësisë, Sajid Javid, tha se ai po tërhiqej sepse me sa duket nuk kishte arritur të merrte mjaftueshëm mbështetje. Më herët, ministri i Transportit Grant Shapps njoftoi gjithashtu se ai tërhiqej nga kandidatura e tij dhe do të mbështeste ish-ministrin e Financave Sunak.
Ndërkohë, Sekretarja e Jashtme Truss ka fituar mbështetjen e besnikëve të shquar të Boris Johnson, Jacob Rees-Mogg, Nadine Dorries dhe James Cleverly, në atë që shihet si një lëvizje që synon të parandalojë një fitore të Sunak.
Shumë nga mbështetësit e kryeministrit janë ende të zemëruar me Sunak për rolin që luajti në rrëzimin e tij. Sunak dhe Javid dhanë dorëheqjen javën e kaluar, të martën mbrëma, dhe bënë që dhjetëra kolegë të rinj të ndiqnin shembullin e tyre, duke e detyruar ish-shefin e tyre të jepte dorëheqjen si udhëheqës i konservatorëve 36 orë më vonë.
Sunak kryeson pak përpara Truss në sondazhin e fundit të anëtarëve të Partisë Konservatore.
Johnson, mandati trevjeçar i të cilit si kryeministër është dëmtuar nga skandale, dalja e vendit nga Bashkimi Evropian dhe pandemia e koronavirusit, ka thënë se do të qëndrojë në detyrë derisa të zgjidhet pasardhësi i tij.
Anëtarët e Partisë Konservatore do të zgjedhin udhëheqësin e tyre të ri përpara konferencës vjetore të konservatorëve në fillim të tetorit - 358 deputetë konservatorë do të votojnë në raunde të shumta derisa të zgjidhen dy kandidatë për raundin përfundimtar. Emri i fituesit dhe kryeministrit të ri britanik do të shpallet më 5 shtator. /Nacionale/
