Izraeli akuzon Sirinë për hedhje të raketave, nis sulmet në objektiva ushtarake siriane
Ushtria izraelite ka njoftuar se vendi ka nisur sulmet kundër objektivave ushtarake siriane pasi hedhjes së disa raketave nga Siria.
Forcat e Mbrojtjes të Izraelit (IDF) thanë se Siria kishte lëshuar gjithsej gjashtë raketa në drejtim të Izraelit, tre nga të cilat kishin hyrë në territorin izraelit.
Ky ishte shpërthimi i fundit nga Siria pas goditjes së Izraelit ndaj objektivave të militantëve palestinezë në Libanin jugor dhe Gaza të premten herët në përgjigje të dhjetëra raketave të lëshuara nga Libani në territorin izraelit.
“Pak kohë më parë, avionët luftarakë të IDF-së goditën objektiva shtesë në territorin sirian, duke përfshirë një kompleks ushtarak të Divizionit të Katërt të Forcave të Armatosura Siriane, sisteme të radarëve ushtarakë dhe poste artilerie të përdorura nga Forcat e Armatosura Siriane,”- ishte deklarata e IDF-së.
CNN raporton se sulmet nga avionët luftarakë pasuan sulmet e mëparshme të IDF-së në territorin sirian duke përdorur një UAV (avion ose dron pa pilot), i cili synonte lëshuesit që mendohej se kishin lëshuar raketat.
IDF tha se “e sheh shtetin e Sirisë përgjegjës për të gjitha aktivitetet që ndodhin brenda territorit të saj dhe nuk do të lejojë asnjë përpjekje për të shkelur sovranitetin izraelit”.
Por, Siria tha se i ishte përgjigjur "sulmeve ajrore izraelite në pjesën jugore të vendit" dhe pretendoi se kishte kapur "disa raketa izraelite".
"Rreth orës 5 të mëngjesit të sotëm, armiku izraelit kreu një sulm ajror me një numër raketash nga drejtimi i Lartësisë së Golanit të pushtuar sirian, duke synuar disa pika në rajonin jugor,"- tha agjencia shtetërore siriane SANA, duke cituar një burim ushtarak.
Hedhjet e raketave vijnë në mes të tensioneve të rritura në rajon pas bastisjeve të policisë izraelite në xhaminë al-Aksa në Jerusalem.
