Industria franceze e makinave e quan ndalimin e makinave me motor me djegie të brendshme "shkatërrim industrial"
Industria franceze e makinave ka dënuar njëzëri votën e Parlamentit Evropian për të ndaluar prodhimin e makinave me motorë me djegie të brendshme nga viti 2035, duke argumentuar se kjo përbën "shkatërrim industrial" dhe është një "hap drejt së panjohurës".
Duke qenë se prodhuesit gjermanë të makinave kanë shprehur tashmë pakënaqësinë e tyre, mbetet për t'u parë nëse dy vendet që kanë industritë më të mëdha të automobilave në Evropë do të përqafojnë ndalimin e miratuar nga Parlamenti të mërkurën (8 qershor).
Eurodeputetja franceze Karima Delli ka thënë se industria e makinave kishte lobuar fuqishëm për të fshirë vitin 2035 nga teksti i Parlamentit. Partia Popullore Evropiane konservatore (EPP), grupi më i madh politik i parlamentit, ishte përpjekur gjithashtu të kundërshtonte tekstin.
Luc Chatel, kryetar i sindikatës franceze të prodhimit të makinave PFA, paralajmëroi kundër një vendimi të tillë në televizionin francez: "Unë nuk mendoj se do të kemi klientë për makina elektrike; kini parasysh se ato janë dy herë më të shtrenjta se makinat me djegie brendshme”.
Stacionet e karikimit elektrik, shtoi ai, janë shumë të pakta për momentin, duke argumentuar se Francës do t'i duhen "gjithsej një milion stacione karikimi deri në vitin 2030", nga vetëm 60,000 që janë aktualisht në funksion në të gjithë Francën.
Kjo vjen pasi presionet inflacioniste goditën rëndë sektorin, duke rritur kostot e prodhimit të makinave elektrike "me 26%", sipas Chatel.
Pas rezultatit të votimit, ministri francez i ekonomisë, Bruno Le Maire, e cilësoi vendimin si “revolucionar, por pozitiv”, ndërsa nënvizoi se “mbetet një punë e konsiderueshme” për të qenë gati në kohë për vitin 2035.
Le Maire u takua me përfaqësues të industrisë së makinave të premten për të parë mënyrat se "[qeveria franceze] mund të vazhdojë të mbështesë prodhuesit e makinave dhe nënkontraktorët e tyre", duke siguruar në çdo kohë që "stacionet e rimbushjes të prodhohen në Francë sa më shumë që të jetë e mundur".
Pas takimit nuk u dha asnjë deklaratë.
Një zyrtar i industrisë së makinave i tha Euractiv France se idetë e Le Maire "do të kërkonin krijimin e mijëra vendeve të punës". “Ne gjithashtu kemi nevojë për mbështetje të qartë financiare nga shteti për të zhvilluar infrastrukturën përkatëse dhe për të rritur prodhimin e baterive elektrike”.
Para takimit, Le Maire kishte sinjalizuar gjithashtu se do të kërkonte të prezantonte një klauzolë rishikimi, megjithëse nuk është e qartë nëse kjo është konfirmuar për drejtuesit e industrisë.
