Çmimet e larta, Gjermania me pako ndihmëse prej 65 miliardë eurosh për qytetarët
Në mes të krizës energjetike, qeveria e koalicionit gjerman ka rënë dakord për një plan për të ofruar ndihmë financiare për familjet.
"Ne do ta kalojmë këtë dimër," është shprehur kancelari Olaf Scholz, duke thënë se plani synon të mbrojë familjet dhe bizneset gjermane nga ndikimi i inflacionit në rritje.
Sipas Deutche Welle, paketa e tretë e masave të ndihmës nga qeveria përfshin plane për vazhdimin e biletave më të lira të transportit publik dhe uljen e taksave për kompanitë me energji intensive.
Me çfarë problemesh përballen familjet dhe bizneset gjermane?
Sipas Zyrës Federale të Statistikave, në muajin gusht inflacioni në Gjermani është rritur në pothuajse 8%, pas rënies së lehtë në qershor dhe korrik për shkak të programeve afatshkurtra të qeverisë për të ulur barrën e konsumatorit në sektorin e transportit.
Rritjen më të madhe të çmimeve e ka parë sektori i energjisë për shkak të pushtimit të Ukrainës nga Rusia dhe sanksioneve pasuse ndaj Moskës që nxitën një garë kundër kohës për të reduktuar varësinë e Gjermanisë nga gazi rus përpara dimrit.
Një sektor tjetër që po përjeton rritje të inflacionit janë produktet ushqimore, të cilat panë rritje të çmimeve me 12% në qershor përpara se të arrinin në 16.6% në gusht.
Çfarë tha kancelari për paketën?
Duke folur me gazetarët pas bisedimeve, kancelari Olaf Scholz tha se qeveria e tij do të jepte 1.5 miliardë euro për vazhdimin e uljeve të transportit publik pasi oferta mujore e biletave të udhëtimit në vend prej 9 eurosh skadoi në fund të gushtit pas tre muajsh.
Scholz tha gjithashtu se taksat e papritura do të vendosen mbi kompanitë e energjisë për të ulur çmimin e gazit, naftës dhe qymyrit për konsumatorët.
Kancelari dha gjithashtu garanci për furnizimin me energji të Gjermanisë përpara dimrit, pasi Rusia njoftoi të shtunën ndalimin e furnizimeve me gaz në Evropë përmes gazsjellësit Nord Stream 1.
Scholz tha se qeveria e tij kishte marrë "vendime në kohë" për të shmangur mungesat në dimër, të tilla si mbushja e objekteve të depozitimit të gazit dhe rifillimi i termocentraleve me qymyr.
"Ne do ta kalojmë këtë dimër," tha ai.
Kjo është paketa e tretë e ndihmës në Gjermani për këtë vit. Dy pakot e mëparshme përfshinin një zbritje të benzinës, e cila skadon në fund të gushtit, biletën e transportit prej 9 euro dhe një pagesë fikse të çmimit të energjisë për punëtorët.
