"Palaçoja në Pallat Mbretëror", një orë intervistim nga Prokurori dhe Tomë Gashi që erdhi kot

Deputeti i VV-së, Haki Abazi, bëri bujë kur doli për të kërkuar nga Prokuroria që të intervistonte prej kryeministrit Albin Kurti e deri tek Dejona Mihali për rastin e zhdukjes së mostrave të Astrit Deharit, por përfundoi duke vetë ai nën intervistim. Për një orë ndodhi gjithçka dhe asgjë

Është ora 9:30 dhe jam rrugës për te objekti i Prokurorisë Speciale. Për dallim nga Pallati i Drejtësisë ku gjenden shumica e gjykatave, Prokuroria Speciale gjendet në një objekt komercial. Te hymja e saj, janë edhe hymjet e një “Call center” dhe kompani marketingu. Ngjitas tyre është një dyqan dhe një kafeteri. Asgjë nuk duket “speciale”. Megjithatë pozita dhe vendosja e Prokurorisë nuk ka rëndësi, sepse aty po ndodhë një ngjarje speciale, për nga rëndësia.

Aty e ka zyren Prokurori më i përfolur i momentit, Afrim Shefkiu, që po merret me rastin e zbardhjes së vdekjes së aktivistit të VV-së, Astrit Dehari në vitin 2016 në dhomën e paraburgimit në Prizren. Shefkiu si prokuror i Departamentit të Terrorizmit e mori këtë rast të ndjeshëm pasi me kërkesë të prindërve të Deharit, lënda kaloi nga Gjykata Themelore në Prizren, te ajo e Prishtinës. Më pas nga Themelorja e Prishtinës, rasti u transferua te Prokuroria Speciale e Kosovës.

Ka ditur të ndodhë gjithçka gjatë shtatë viteve të fundit sa i përket rastit të Deharit, por prej që Lëvizja Vetëvendosje morri pushtetin në mars 2021, procese kontradiktore kanë nisur të ndodhin. Madje brenda partisë.

A ia bëri Hakia gropën vetës?

Për vite të tëra, Lëvizja Vetëvendosje e ka përdorur rastin e Astrit Deharit për të shpërfaqur sistemin e dështuar të drejtësisë dhe këtë problem të “prokurorisë e gjykatave” e ka përdorur për të dhënë qëndrim politik. Sipas kësaj partie, Dehari ishte vrarë. Dhe ai ishte vrarë nga kundërshtarët e tyre politikë. Ky ishte mesazhi i tyre!

Ose thënë më butë: e ka përdorur Deharin për të argumentuar se politika e tyre është ajo që i duhet vendit. Askush nuk mund ta mohojë rëndësinë që vdekja e Deharit ka pasur në proceset politike të vendit. Sidomos në rrugëtimin e Vetëvendosjes.

Kësisoj, ajo që deputeti i VV-së, Haki Abazi ka për të thënë ka rëndësi të madhe. Për këtë arsye, akuzat dhe kërkesat e tij për liderët kryesor të partisë që drejton edhe Qeverinë, u morën seriozisht edhe nga Prokurori. Prokuroria nuk ftoj ata që Abazi tha se duhet intervistuar por e ftoi vet atë.

Toma si vizitor, sa me dhënë një deklaratë

Është ora 9:51 dhe të gjithë gazetarët janë në pritje të Haki Abazit që të vi tek Prokuroria. Por para tij, vjen avokati i familjes Dehari, Tomë Gashi. Ai jo zyrtarisht me VV-në. Sidomos kur bëhet fjalë për rastin Dehari. Një natë më parë ai kishte kërkuar nga Prokuroria që t’ia lejonte atij që të bëhej pjesë e intervistimit të Abazit. Pasi hynë në Prokurori, Gashi del shpejt.

“Për bindjen time prokurori nuk dëshiron të jetë transparent dhe më largoi nga objekti”, tha Gashi, teksa u fliste gazetarëve.

Tentoj që të flas me të më privatisht, por më thotë “për një herë tjetër”. Kam shumë pyetje për të. Edhe për prokurorin i cili është komplet i panjohur në jetë dhe diskutim publik. Por për ta në ndonjë storje të radhës. Për tash, ndiqeni atë çfarë ndodhi në Prokurorinë Speciale ku ishte për t’u intervistuar deputeti Abazi.