Ylli i Real Madridit e pëson keq, e këput ACL-në dhe do të mungojë gjatë

Mbrojtësi i Real Madridit, Eder Militao, ka pësuar një lëndim të rëndë, duke këputur ligamentin kryqëzor të gjurit të majtë dhe tani do të detyrohet t’i nënshtrohet një operacioni, ku pritet të mungojë së paku gjashtë muaj.

Reprezentuesi brazilian, 25 vjeç, u detyrua të largohej në fillim të pjesës së dytë të fitores 2:0 të Madridit ndaj Athletic Bilbaos për të hapur sezonin e ri të La Ligës.

Ai u vendos për skanime pas lojës me testet mjekësore që konfirmuan më pas më të keqen.

Në një deklaratë të klubit të dielën thuhej: “Pas analizave të kryera te lojtari ynë Eder Militao, ai u diagnostikua me një këputje të ligamentit të kryqëzuar të përparmë në gjurin e majtë. Lojtari do t'i nënshtrohet një operacioni në ditët në vijim.”

Futboll / Jo vetëm Courtois, edhe Arda Guler do të operohet

Trajneri Carlo Ancelotti kishte frikë nga më e keqja kur u pyet pas ndeshjes të së shtunës mbrëma.

“Është një ndrydhje në gju, nuk duket mirë,” tha ai. “Do ta vlerësojmë në orët e ardhshme. Nuk mund të përjashtojmë që të jetë një dëmtim serioz”.

Lëndimi i Militaos është pengesa e dytë serioze e javës së fundit për Madridin pas dëmtimit të portierit Thibaut Courtois në ACL që ka të ngjarë ta përjashtojë atë për sezonin.

Militao është bërë pjesë integrale e skuadrës së Realit pas lëvizjes së tij prej 50 milionë eurosh nga Porto në vitin 2019.

Ai ka bërë 143 paraqitje për klubin gjatë pesë sezoneve të fundit dhe është dy herë fitues i La Ligës dhe ishte gjithashtu pjesë e skuadrës që fitoi Ligën e Kampionëve në vitin 2022.