Ylli i Aston Villës nuk është prioritet i hetuesve në skandalin e basteve
Prokuroria Publike e Torinos nuk e ka për nxitim që të flasë me mesfushorin e Aston Villës, Nicolo Zaniolo, në lidhje me përfshirjen e tij në skandalin e basteve, që shpërtheu në kampionatin italian.
Mesfushori 24-vjeçar italian është vënë zyrtarisht nën hetim për përdorimin e platformave të parregullta të lojërave të fatit, me disa akuza që pretendojnë gjithashtu se ka vënë baste në ndeshje futbolli, diçka që ai e ka mohuar.
Zaniolo dhe Sandro Tonali i Newcastle u tërhoqën nga skuadra kombëtare e Italisë në fillim të këtij muaji pas një vizite nga policia në terrenin stërvitor në Coverciano. Ky i fundit tashmë pritet të dënohet me 10 muaj pezullim, pasi ka vënë baste në fitoret e Milanit dhe Brescias, gjatë kohës së tij në të dy klubet.
Një raportim nga Corriere dello Sport përmes TMW detajon se si Zaniolo po konsiderohet aktualisht një figurë margjinale në skandalin e basteve në Serie A dhe nuk është një prioritet për Prokurorinë Publike të Torinos, e cila aktualisht po fokuson përpjekjet e saj në lidhjet me krimin e organizuar.
Zaniolo beson se gabimi i tij – kumari në blackjack – ishte i parëndësishëm dhe nuk do të përballet me një ndalim të gjatë, kështu që ai nuk nxiton të flasë me hetuesit. Ndryshe nga Nicolo Fagioli dhe Tonali i Juventusit, mesfushori i Aston Villa nuk ka pasur kurrë qëllim të raportojë veten tek autoritetet.
