Vendimet e Alain Giresse dhe mungesa e përkushtimit të lojtarëve i kushtuan Kosovës kundër Greqisë

Alain Giresse vendosi ta ndryshojë sistemin e lojës së Kosovës nga 4-3-3 në 4-2-3-1 kundër Greqisë, pas dy ndeshjeve të suksesshme me skemën e parë. Vendimi i tij për ndryshim sistemi mund të mos ketë qenë i gabuar, por vendosja e lojtarëve në atë sistem sigurisht që ishte dhe si pasojë i kushtoi dardanëve me disfatë 1:0 kundër grekëve të dielën në shtëpi.

Kosova ka dëshmuar lojë shumë të mirë dhe të frytshme në sistemin 4-2-3-1 në të kaluarën nën urdhrat e ish-trajnerit Bernard Challandes. Njëlloj ishte edhe për Giresse në debutimin e tij mbresëlënës 5:0 kundër Burkina Fasos në një ndeshje miqësore në mars.

Por për çdo sistem të lojës, duhet t’i kesh lojtarët e duhur dhe t’i vendosësh ata në pozitat e duhura. Trajneri francez u përballë me disa mungesa, veçanërisht në mbrojtje, por ai nuk kishte mungesa në sulm dhe mesfushë, ku bëri zgjedhje të gabuara.

Vendosja e Betim Fazlijit në qendër të mesfushës, Arbër Zenelit si mesfushor sulmues pas sulmuesit kryesor, Vedat Muriqit, si dhe e Benjamin Kolollit në vend të Zenelit më vonë, u dështuam vendimeve të gabuara nga 69-vjeçari.

Fazjili është i mësuar të luajë si qendërmbrojtës në përgjithësi, megjithëse i ka bërë disa paraqitje si mesfushor qendror për klubin e tij këtë sezon dhe te Kosova, pas largimit të Hekuran Kryeziut, këtë pozitë e ka mbuluar më së miri Ibrahim Dresevic, i cili luajti vetëm si zëvendësues në pjesën e dytë në Fadil Vokrri.

Zeneli i Reims gjithmonë ka shkëlqyer për Kosovën si sulmues anësor, pra i majtë, dhe ai për herë të parë u vendos si mesfushor sulmues pas Muriqit. Nuk është se në këtë pozitë Giresse nuk ka pasur opsione, sepse në ekip e ka Florent Muslijan, i cili është ndër lojtarët me teknikën më të lartë të Kosova.

Mesfushori sulmues 23-vjeçar, ka pasur një sezon të mrekullueshëm me Paderborn në Bundesliga dy dhe ai shkëlqeu në fitoren e Kosovës kundër Burkina Fasos pikërisht në atë pozitë në mars.

Por Giresse zgjodhi që Muslijan të mos e përdor as si zëvendësues për Zenelin, duke e futur në lojë Kolollin Shimizu në Japoni, pavarësisht se ai kurrë nuk ka luajtur në atë pozitë. 30-vjeçari ka shkëlqyer më së shumti te Kosova si mbrojtës i majtë, edhe pse është mesfushor i majtë natyral.

Vendimet e Giresse nuk prodhuan aspak fryt, pasi Kosova nuk arriti të krijojë asgjë as përmes Zenelit e Kolollit, e as Fazliji nuk qe në gjendje ta shtynte skuadrën përpara me pasimet e tij.

Ndeshja e mbrëmshme ishte ndër ndeshjet më të dobëta të Kosovës dhe sigurisht më e dobëta nën udhëheqjen e Giresse.

Pas dy ndeshjeve, Kosova është e dyta në Grupin 2 të Ligës C në Ligën e Kombeve, me tri pikë, tri më pak se liderja Greqia. Grupin e mbyllin Irlanda e Veriut me Qipron me nga një pikë secila.

Mungesa e përkushtimit dhe harmonisë

Qëkur lojtarët dolën në fushën Fadil Vokrri për t’u njohur me barin e fushës, ke mundur ta vëresh Edon Zhegrovën, mbase lojtarin më të mirë të Kosovës gjatë këtij grumbullimi, duke u shëtitur vërdallë i vetëm, derisa bashkëlojtarët e tij po bisedonin në grupe.

Ajo ka mundur të ishte rastësi, por nuk ishte, sepse Zhegrova ishte i vetmuar edhe gjatë ngrohjeve që lojtarët bënë para ndeshjes. 11-shja e parë e Kosovës po ngrohej në dyshe, duke pasuar njëri me tjetrin, por Zhegrova po ecte me topin i vetëm.

Zhegrova shihej duke argumentuar me Vedat Muriqin dhe duke u qortuar nga sulmuesi i Lazios disa herë, për shkak të mbajtjes së tepërt dhe joefektive të topit.

Zhegrova është parë i problematik dhe egoist në të kaluarën, por me ardhjen e Giresse ai ka zënë vend të formacionin e parë dhe më të drejtë, në bazë të formës që ka treguar.

Ishte një ndjesi po ashtu se jo të gjithë lojtarët po vraponin për ta djersitur fanellën dardane të dielën mbrëma në Prishtinë.

Gjërat do të vështirësohen më shumë për Giresse për ndeshjen e së enjtes kundër Irlandës së Veriut në Prishtinë, pasi Fidan Aliti dhe Aro Muric nuk kanë të drejtë të luajnë si pasojë e pezullimit, pas kartonëve të kuq kundër grekëve.