Thirrje homofobike në ndeshjen City – Chelsea? | FA do të nisë hetime
Federata angleze e futbollit(FA) do të nisë hetime mbi thirrjet e dyshuara homofobike në ndeshjen mes Manchester Cityt e Chelsea në kuadër të FA kupës, ku qytetarët mposhtën të kaltrit e Londrës me rezultat 4:0.
Këndimi diskriminues në kor u dëgjua nga fundi i ndeshjes së raundit të tretë në Etihad Stadium, ku City i dha leksion Chelseas.
FA thotë se do të punojë me autoritetet ligjore dhe me skuadrën e Manchester Cityt për të shqyrtuar incidentin, duke shkruar në një deklaratë: "Ne vazhdojmë të punojmë ngushtë me Prokurorinë Mbretërore, si dhe Njësinë e Policisë së Futbollit të Mbretërisë së Bashkuar, në lidhje me atë se çfarë u dëgjua në stadium.
"Një pjesë e punës sonë në këtë fushë ka qenë për t'u dhënë autoriteteve përkatëse deklarata nga mbështetësit LGBTQ+, duke detajuar se si këndimet e kësaj natyre ndikojnë në përvojën e tyre dhe ndjenjën e përfshirjes në ndeshjet e futbollit, në mënyrë që të vendoset një qëndrim më i qartë dhe mirëkuptim mbi këndimin.
"Ne qëndrojmë me forcë kundër të gjitha formave të diskriminimit dhe po përpiqemi të sigurojmë se loja jonë është një mjedis i sigurt për të gjithë, i cili përqafon me të vërtetë diversitetin dhe sfidon ndjelljen e urrejtjes si në fushë ashtu edhe jashtë saj."
BREAKING: The FA are to look into homophobic chanting from some Manchester City fans at today’s FA Cup tie between City and Chelsea at the Etihad. pic.twitter.com/fLk4K5hJjM
— Sky Sports News (@SkySportsNews) January 8, 2023
Kjo nuk është hera e parë këtë javë në FA kupë që dëgjohen thirrje homofobike.
FA ka premtuar tashmë një hetim në pretendimet se këngët homofobike janë dëgjuar gjatë fitores 3:1 të Manchester Unitedit kundër Evertonit në Old Trafford të premten.
Ky do të ishte hetimi i dytë për homofobinë e supozuar nga tifozët e Unitedit këtë sezon, pasi këngë të tilla u dëgjuan gjatë përballjes së tyre kundër Chelseat në Premierligë në tetor të vitit të kaluar.
Një tjetër hetim u nis javën e kaluar pas barazimit të Chelseat në Premierligë kundër Nottingham Forest më 1 janar.
