Sneijder paralajmëron Manchester Cityt dhe Haalandin para finales në Ligë të kampionëve ndaj Interit

Legjenda e Interit, Wesley Sneijder, insiston se nuk ka ‘ndeshje të pamundur’, kështu që zikaltrit kanë shanset e tyre për ta mposhtur Manchester Cityn në finale të Ligës së Kampionëve, më 10 qershor në Stamboll.

Skuadra e Simone Inzaghit u kualifikua në finalen e tyre të parë të Ligës së Kampionëve në më shumë se një dekadë duke eliminuar rivalët e qytetit, Milanin, në gjysmëfinale.

Futboll / Interi e mposht bindshëm Milanin për të kaluar në finale të Ligës së Kampionëve pas 13 viteve

Sneijder, një fitues i Ligës së Kampionëve me Interin në vitin 2010, ndoqi ndeshjen e dytë kundër kuqezinjve nga Curva Nord në San Siro së bashku me tifozët e flaktë dhe ish-mbrojtësin e Interit, Marco Materazzin.

“E marta ishte një natë e mrekullueshme, nuk do ta harroj kurrë”, tha Sneijder për Gazzetta. “Nuk ndodh shpesh të shkosh në një Curva të vërtetë dhe San Siro është unik në net të caktuara. Atmosfera në ndeshjen kundër Milanit të kujtonte gjysmëfinalen kundër Barcelonës dhe me mikun tim të mirë dhe të çmendur, Materazzin, ishte edhe më qesharake.”

A është një detyrë e pamundur për Interin të mundë Manchester Cityn në Stamboll më 10 qershor?

Futboll / Manchester City në finale, e turpëron Real Madridin në Ligën e Kampionëve

“Nuk ka lojëra të pamundura, ka lojëra të vështira dhe kjo është me siguri një nga ato”, paralajmëroi ish-mesfushori holandez. “Interi mund të bëjë gjithçka në një ndeshje. Shumë menduan se nuk kishim shanse kundër Barcelonës në vitin 2010, por atëherë duhet të luani…”

Skuadra e Interit dhe e Sneijder eliminoi Barcelonën e Pep Guardiolës në gjysmëfinale në 2010 dhe vazhdoi të fitonte trofeun në një finale kundër Bayern Munich.

“Ekipet janë të ndryshme dhe futbolli gjithashtu ka ndryshuar”, vuri në dukje Sneijder. “Guardiola ka krijuar diçka të jashtëzakonshme, por ata mund të pranojnë diçka në mbrojtje dhe Interi është i strukturuar fizikisht për të përmbushur detyrën.”

Po Erling Haaland, a është ai sulmuesi më i mirë në Evropë për momentin?

“Për momentin, ai është ndoshta sulmuesi më shkatërrues, por askush nuk fiton i vetëm,” argumentoi Snijder. “Manchester City ka aq shumë lojtarë të rrezikshëm sa është e pamundur të fokusohesh vetëm te një. Interi duhet të luajë si njësi, të ecë përpara pa frikë dhe të mbajë kokën lart”.

Nga ana tjetër, Interi mund të mbështetet te fituesi i Botërorit me Argjentinën, Lautaro Martinez. A mund të jetë El Toro një kandidat për Topin e Artë nëse ai gjithashtu ngre Ligën e Kampionëve?

“Lautaro duhet të mendojë se fitimi i Ligës së Kampionëve me Interin është gjëja më e mirë që mund të ndodhë. Ai tashmë ka fituar Kupën e Botës, e cila konsiderohet për çmimin [Topi i Artë]. Në përgjithësi, ai është një sulmues i fortë dhe është përmirësuar kaq shumë.”

Inzaghi ka kaluar periudha të vështira këtë sezon, cila është cilësia e tij më e mirë?

“Rezistenca. Ai ka menaxhuar situata të vështira dhe në fund kishte të drejtë sepse të gjithë duken të lumtur tani. Kjo është mënyra më e mirë për të arritur një finale.”