Slot: Salah ka marrë gjithmonë vendime të zgjuara, shpresojmë që do ta bëjë përsëri
Trajneri i Liverpoolit, Arne Slot, ka thënë se klubi dëshiron që Mohamed Salah të qëndrojë edhe pas kësaj vere, duke këmbëngulur se nuk është i befasuar nga interesimi i Arabisë Saudite për lojtarin.
Kontrata e Salah skadon në qershor dhe egjiptiani zbuloi muajin e kaluar se është "shumë larg" arritjes së një marrëveshjeje për një kontratë të re në Anfield.
Salah ka qenë prej kohësh i lidhur me një transferim në Arabinë Saudite, ndërsa ministri i sportit i vendit, Princi Abdulaziz bin Turki Al Faisal, këtë javë deklaroi për Piers Morgan Uncensored se do të donte ta shihte atë në Ligën Pro Saudite.
“Do të ishte befasi nëse dikush do të thoshte se nuk e do Mo Salah”, tha Slot kur u pyet për komentet e Al Faisal në një konferencë për shtyp të premten.
“Ai ka bërë kaq mirë për kaq shumë vite, sa të gjithë ndoshta e duan atë. Ai ka ndjekur rrugën e tij pa pasur nevojë për këshillat e mia, kështu që mund të vazhdojë të bëjë atë që është më e mira për karrierën e tij. Këshilla ime për të do të ishte ndryshe nga ajo e Al Faisal. Të gjithë e duan atë, përfshirë edhe ne. Sigurisht që duam që ai të qëndrojë. Kjo është e qartë. Por nuk jam i habitur që ka interes për të. Ai ka marrë gjithmonë vendime të zgjuara për karrierën e tij, dhe shpresojmë që do ta bëjë edhe kësaj here – si për veten e tij, ashtu edhe për ne.”
Përveç Salah, kapiteni i Liverpoolit, Virgil van Dijk, dhe zëvendëskapiteni Trent Alexander-Arnold janë gjithashtu afër skadimit të kontratës këtë verë, me këtë të fundit që muajin e kaluar është raportuar se ka qenë në radarin e Real Madridit.
I pyetur nëse ka dhënë mendimin e tij për të ardhmen e treshes, Slot tha:
"Sigurisht. Unë flas me këta lojtarë, jo çdo ditë si Richard [Hughes], por shumë shpesh. Do të ishte e çuditshme që gjatë gjithë këtyre bisedave të mos kishim diskutuar për të ardhmen. Sigurisht që e bëjmë. Por kjo nuk është diçka që do ta diskutoj me mediat. Nuk flasim vetëm për ata që janë afër ta përfundojnë kontratën, por edhe me lojtarët e tjerë për planet e tyre. Është një proces i vazhdueshëm."
