Raportohet se legjenda Pele është transferuar në kujdesin shëndetësor për fundin e jetës
Legjenda e futbollit brazilian Pelé po merr kujdes paliativ pasi trajtimi me kimioterapi për kancerin e zorrës së trashë nuk kishte rezultatet e pritura, siç është raportuar nga mediat botërore.
Pelé, 82 vjeç, i cili konsiderohet gjerësisht si një nga futbollistët më të mëdhenj të, të gjitha kohërave, u shtrua në spital të martën për të rivlerësuar trajtimin e tij të kancerit dhe më vonë u diagnostikua me një infeksion të frymëmarrjes, sipas raporteve mjekësore.
Folha de S. Paulo raportoi se kimioterapia tani ishte pezulluar dhe se Pelé ishte nën kujdesin paliativ, duke u trajtuar vetëm për simptoma të tilla si dhimbje dhe gulçim.
Menaxheri i tij dhe spitali Albert Einstein, në São Paulo, nuk iu përgjigjën menjëherë kërkesave për koment.
Një raport mjekësor i lëshuar të premten tha se Pelé kishte reaguar ndaj një trajtimi me antibiotik dhe ishte në një gjendje të qëndrueshme "me përmirësim të përgjithshëm në gjendjen shëndetësore".
Atij iu hoq një tumor nga zorra e trashë në shtator 2021 dhe ka marrë trajtim spitalor rregullisht.
Pelé tha në një postim në Instagram të enjten se ishte në spital për një "vizitë mujore" dhe falënderoi mbështetësit e tij për mesazhet pozitive që kishte marrë.
Ish-sulmuesi i Brazilit, Santos dhe New York Cosmos postoi një foto të fytyrës së tij të projektuar në një ndërtesë në Katar, ku po mbahet Kupa e Botës, pranë një mesazhi që thoshte: "Shërohu shpejt".
Një shenjë me të njëjtin mesazh u shfaq nga tifozët brazilianë në stadiumin Lusail të premten përpara humbjes 1-0 të kombëtares kundër Kamerunit.
