Policia italiane arreston disa persona pas përleshjeve të djeshme mes tifozëve të Napolit dhe Frankfurtit
Tetë persona janë arrestuar pas dhunës mes tifozëve të Eintracht Frankfurt dhe Napolit para dhe pas ndeshjes në Ligën e Kampionëve të mërkurën mbrëma.
Policia e Napolit ka njoftuar se pesë tifozë të Napolit dhe tre tifozë gjermanë janë arrestuar pas trazirave të së mërkurës.
Gjatë kësaj përleshjeje gjashtë oficerë policie u plagosën sipas Alessandro Giuliano, i cili është përgjegjës për sigurinë publike në Napoli.
“Forcat e rendit janë duke u përpjekur që të identifikojnë 470 tifozë gjermanë që qëndruan në qytet, për të dënuar ata që janë përgjegjës për çrregullimin”, tha ai në një konferencë për shtyp.
Përplasjet e para ndodhën pasditen e së mërkurës në Napoli duke vazhduar edhe pas ndeshjes, ku Napoli triumfoi lehtësisht me rezultat 3:0 për të siguruar kualifikimin në çerekfinalen e Ligës së Kampionëve për herë të parë në histori.
Bomba tymi, zjarre, karrige, shishe dhe shtylla metalike u hodhën ndaj policisë e cila u kundërpërgjigj me gaz lotsjellës.
Më vonë, tifozët e Napolit u filmuan nga mediat italiane duke hedhur objekte në autobusët që transportonin tifozë të Frankfurtit.
Anëtari i bordit te Frankfurtit, Philipp Reschke kërkoi falje pas veprimit të tifozëve: “Na vjen shumë keq për ngjarjet që kanë ndodhur dhe nuk ka absolutisht asgjë për të justifikuar këtë dhunë që është e papranueshme. Kjo dëmton futbollin, dëmton Eintracht Frankfurt dhe dëmton përpjekjet tona për t’u mbështetur për tifozët që duan të shikojnë një lojë pa kufizime në stadium”.
Ndërkohë edhe mbrojtësi i Napolit Juan Jesus kishte disa fjalë për të thënë në lidhje me ngjarjen: “Nuk është e mundur të shihet ende kjo në vitin 2023. Është keq për qytetin dhe keq për futbollin. Njerëzit vijnë, pastaj shkatërrojnë dhe largohen, nuk është gjë e mirë na vjen keq që i shohim këto skena”.
Nëntë persona ishin arrestuar për shkak të telasheve të njëjta në ndeshjen e parë mes Frankfurtit dhe Napolit, që ishte zhvilluar në Itali.
